2022 оны улсын төсөвт Богд зонхова төсөлд 32.5 тэрбум төгрөг төсөвлөсөн талаар Соёлын сайд Ч.Номин тайлбар өгчээ. Гэхдээ сайдын цахим хаягтаа бичсэн тэрхүү зйүл нь тайлбар гэхэд бас учир дутагдалтай. Тэрбээр "Түүх, шашны соёлыг дэлгэрүүлэх "Богд Зонхова" цогцолборын төсөл намайг Соёлын сайдаар томилогдохоос өмнө эхэлсэн төсөл юм. Анх Соёлын яам энэ цогцолборыг барих, эхлүүлэх санаачилга гаргаагүй, өнгөрсөн хугацаанд энэ төсөлд нэг ч төгрөг зарцуулаагүй болно.
Энэ хөрөнгө оруулалтыг цаг үеэ олоогүй гэж үзэж байгаа учраас Соёлын сайдын хувьд “Богд зонхова” цогцолборын төсөлд хөрөнгө зарцуулахгүй болохоо үүгээр мэдэгдэж байна. Монгол Улсын хувьд түүх, соёл, шашин нь бидний оршин тогтнохтой холбоотой асуудал. Гэвч, аль ч шашинд сүсэглэх, шүтэх нь аливаа цогцолборыг барих, болихоос үл шалтгаалах дотоод итгэл үнэмшлийн асуудал тул эвийг эрхэмлэхийг Та бүхнээс хичээнгүйлэн хүсье" хэмээжээ.
Улсын төсөв бол УИХ-аас 4 хэлэлцүүлэг хийж баталдаг хууль. Энэ хуулийг хэрэгжүүлэх нь Засгийн газрын үүрэг. Гэтэл Соёлын сайд Ч.Номин хэл ам дагуулаад байгаа Богд зонхова төсөлд хөрөнгө зарцуулахгүй хэмээн мэдэгдлээ. Төсвийн тухай хуулийг өөрчлөх эрх зөвхөн УИХ-д л бий. Ч.Номин сайд шийдээд төсөв зарцуулахаа зогсоолоо гэхэд төсвийн хууль зөрчсөн хэрэгт унана.
Энэ төсөл Ч.Номин сайдаас өмнө эхэлсэн нь бол үнэн. Гэхдээ дэмжихгүй гэсэн юм бол төсвийг нь хасаж батлуулах байв. Тэгээгүй учраас өмнө ч бай, хойно ч бай энэ төслийг буюу 32 тэрбумын лоббиг дэмжсэн гэсэн үг. Ч.Номин сайд УИХ-аас давж дуугарснаараа өөр дээрээ бас л гал дуудав. Түүний зөвлөхүүд лав ажлаа хийдэггүй бололтой юм. УИХ-ын бүрэн эрхэд хэнбугай ч халдах эрхгүй. Тиймээс Ч.Номин сайд дуугаа жаахан аядна уу даа.
