Сонгинохайрхан нэгдсэн эмнэлгийн ажилтан Б.Хонгор ерөнхий мэдээгүйжүүлэгтэй буюу унтуулгатай төлөвлөгөөт хагалгаануудыг тодорхойгүй хугацаагаар хойшлуулах нөхцөл байдал үүссэн талаар цахим хуудсаараа мэдээлжээ. Түүний мэдээлснээр, ерөнхий мэдээгүйжүүлгийн үед хэрэглэдэг фентанил тариа ойролцоогоор нэг сарын хугацаанд тасалдалтай байгаа бөгөөд эмнэлэгт цөөн тоогоор нийлүүлэгдэж, тасаг хооронд хуваарилан хэрэглэж байгаа аж.
Тэрбээр, “ Ерөнхий мэдээгүйжүүлэгтэй (унтуулгатай) төлөвлөгөөт хагалгаанууд орох боломжгүй боллоо шүү! хүмүүсээ. Унтуулгын үеэр хэрэглэдэг зарим тариа (фентанил) тасраад сар орчмын нүүр үзэж байна. Энэ хугацаанд манай эмнэлэгт лав хааяа хааяадаа амь зогоох хэдхэн ширхгийг өгч, өнөөхийгөө хэдэн тасагтаа дотроо хуваарилж тарааж амь зогоож байгаа үзэгдэл танил боллоо. Энэ байдал хэдий хүртэл үргэлжлэхийг, ямар арга хэмжээ авч байгаа талаар одоогоор тодорхой мэдээлэлгүй л энэ тариаг зайлшгүй хэрэглэдэг эмнэлгийн ажилчид маань хий дэмий санаа зовсон байдалтай төлөвлөгөөт хагалгаанд орох хүмүүсээ тодорхойгүй хугацаагаар хойшлуулсаар л байна. Он дуустал энэ байдлаараа байвал бүр яаралтай хагалгааны үед ч тариагүй хэцүү байдалд орохоор болоод байдаг. Ганцхан энэ тарианы хомсдлоос үүдэж улс даяараа төлөвлөгөөт хагалгаанууд хойшлох, хүлээгдэл хэт их үүсэх, хүний амь нас эрүүл мэнд цаг хугааны хүлээгдлээс үүдэж хохирох, бүр цаашлаад эмнэлгүүд огт нөөцгүй болчихвол яаралтай нэн амь тэнссэн үеийн мэс засал ч ороход хэцүү болох үр дагавартайг мэргэжлийн хариуцаж ажилладаг эрх бүхий хүмүүс нь мэдэж байгаа гэж найдаж байна. Одоо үүсээд байгаа нөхцөл байдлын талаар эрүүл мэндийн сайд Энхбаярын Батшугар та тодорхой мэдээлэл өгч, яаралтай арга хэмжээ авч ажиллаач ээ! гэж хүсч байнаа. Сайдыг таньж мэддэг, ойрын хүмүүс нь энэ постыг харж байвал сайдад энэ мессежийг дамжуулаарай гэж давхар хүсье!!! Энэ ганцхан манай Сонгинохайрхан Нэгдсэн эмнэлэг -т тохиолдоод байгаа явдал биш, улс даяар ийм болчихоод байгаа шүү” гэв.
Б.Хонгор энэ асуудал зөвхөн Сонгинохайрхан нэгдсэн эмнэлэгт хамаарахгүй, улс даяар үүсээд байгаа нөхцөл байдал гэж мэдээлээд, Эрүүл мэндийн сайд Энхбаярын Батшугар болон холбогдох эрх бүхий байгууллагуудыг нөхцөл байдлын талаар тодорхой мэдээлэл өгч, яаралтай арга хэмжээ авахыг хүсжээ.
Фентанилын нийлүүлэлтэд ямар шалтгаанаар тасалдал үүссэн, одоогоор улсын хэмжээнд ямар хэмжээний нөөц байгаа, хэзээ хэвийн нийлүүлэлтэд шилжих төлөвтэй байгаа талаар холбогдох байгууллагуудаас албан ёсны тайлбар шаардлагатай байна.
