ОХУ-ын Ерөнхийлөгчийн хэвлэлийн нарийн бичгийн дарга Дмтрий Песков өчигдөр буюу зургадугаар сарын 28-ны өдөр мэдээлэл хийхдээ, Оросын цэргийн тусгай ажиллагааны дуусах цаг хугацаа тодорхой бус байна гэжээ. Өвлийн улирал эхлэхээс өмнө мөргөлдөөнийг зогсоох төлөвлөгөөний талаар Зеленскийн хэлсэн үгтэй холбогдуулан Песков хэлэхдээ, хэрэв Украины тал үндсэрхэг үзэлтнүүдэд зэвсгээ хаяхыг шаардаж, Оросын талын болзлыг хангасан нөхцөлд цэргийн тусгай ажиллагааг өнөөдөр ч дуусгаж болох юм гэжээ.
ОХУ-ын ГХЯ-ны хэвлэлийн төлөөлөгч Мария Захарова 28-ны өдөр хэлэхдээ, барууны удирдагчид үндэсний аюулгүй байдлыг хэрхэн хамгаалах, гаргасан шийдвэрийнхээ хариуцлагыг хүлээх чадваргүй байгааг "G7"-ын дээд хэмжээний уулзалт харуулж байна. Түүхийн аль ч шатанд НАТО Оросын эсрэг түрэмгийлэх бодлого явуулахыг зорьдог болохоос биш харин дэлхийн чанартай асуудал, өрсөлдөөн сорилттой тэмцэхийн төлөө ажилладаггүй. НАТО-гийн логикийн үндэс нь цар хүрээгээ тасралтгүй тэлэх, Оросыг бүслэх, Оросын хил дээр цэргийн хүчээ өргөжүүлэх, шинэ зэвсэг байрлуулах, түүнчлэн өөрсдийн хөгжлийг хязгаарлах тухай гэрээ хэлэлцээр, хэм хэмжээг зөрчсөн явдал юм гэжээ.
ОХУ-ын ГХЯ мөн 28-ны өдөр мэдэгдэл гаргаж, Оросын улс төр, нийгмийн зүтгэлтнүүдийн эсрэг АНУ-ын авсан хориг арга хэмжээ цаашид өргөжиж байгаа нөхцөл байдалд ОХУ хариу арга хэмжээ авч АНУ-ын ерөнхийлөгч Жо.Байдены гэргий болон охиныг багтаасан Америкийн 25 иргэнийг өөрийн хилээр нэвтрэхийг тодорхойгүй хугацаагаар хориглох шийдвэр гаргасан байна.
