Ардчилсан нам хоёр хуваагдаад удав. 2020 оны сонгуулиас хойш энэ нам өөд нар харсангүй. Хэдхэн лидер нь хэмлэлдсээр намаа, залуусаа хөлдөө чирэв. Өдөөж дөгөөсөн хүн нь өнөөх С.Эрдэнэ. Одоо бас Монголын ардчилсан холбоонд энэхүү хагарал, талцал нь халдварлав. Ард нь байгаа хүн нь аанай л С.Эрдэнэ. Хоёр жилийн өмнө намаа сонгуульд навс ялагдуулчихаад улс төрийн хариуцлагаа хүлээн, байр сууриа тавьж өгөөд явах ёстой байсан энэ хүн өнөөг хүртэл ингэж үхэн хатан зууралдах нь өөрт нь л хэрэгтэй байдаг байх. Түүнээс биш Ардчилсан намд лав сөрөг оноо л болж очиж байгаа.
Ардчилсан намын дарга байхдаа С.Эрдэнэ намынхаа хагарлын эхийг тавьсан хүн. Намын дүрмээ дур мэдэн өөрчилж, тэр нь Дээд шүүх дээр бүдэрч, Ардчилсан намын бүх шатны байгууллагын удирдлагыг өөрийн хүмүүсээр сольж, халаа сэлгээг баруун солгойгүй хийснээс эхлээд олон буруу үйлдэл нь гишүүд дэмжигчдийнх нь эсэргүүцэлтэй тулсан. Ардчилсан нам дотоод ардчилалгүй болж, намын Үндэсний бодлогын хороо нь ротацийн сонгуулиа хийж чадахгүйд хүрсэн нь сонгуульд болон томилгоот бүхий л албан тушаалыг мөнгөөр үнэлж, өндөр тоотой мөнгөний босго тогтоосонтой холбоотой. Ерөөсөө 2017 онд Ардчилсан намын даргын сунгаа гэгчийг зохион байгуулж таван нэр дэвшигч өрсөлдөхөд л С.Эрдэнэ бусдыгаа харлуулах, гүтгэх хар технологийг нам дотроо хийж, эцэст нь санал хураалтыг нь хүртэл луйвардаж, будлиантуулсан юм. Өөрөөр хэлбэл С.Эрдэнийг Ардчилсан намын даргаар сонгосон нь өнөөгийн энэ хагарлын эхлэл байв. Нэрт нийтлэлч Баабар С.Эрдэнийг даргаараа сонгоод Ардчилсан нам муугийн ёроолдоо хурдан хүрээсэй гэж байсан нь өнөөдөр биеллээ олов.
С.Эрдэнэ намаа хувааж хагаралдуулаад зогсохгүй Монголын ардчилсан холбоо хэмээх төрийн бус байгууллагыг мөн хоёр хувааж орхив. Ардчилсан хөдөлгөөн үүссэн, тухайн үеийн Улс төрийн товчоог огцруулсан түүхийг халт мөлт сонссоноос цаашгүй, тэр түүхэн үйл явдал болсон сар, өдрийг хүртэл мэдэхгүй тийм залуусыг С.Эрдэнэ “сумлан” зуудаг нохой шиг тавьжээ. Нөгөө талд нь ч гэсэн Х.Баттулга гэж “баастай бурхан” С.Эрдэнээсээ дээрдэх юмгүй. Бүхэл бүтэн 15 жил Монголын ардчилсан холбоог удирдчихаад байр сууриа тавьж өгөхгүй барьцалдан тэмцэлдэж байгаа аж.
С.Эрдэнэ улс төрд ч, урлаг, спортод ч эвдрэл дагуулж явсаар энэ хүрчээ. Монголын сагсан бөмбөгийн холбоог хоёр хувааж хаяад, нэг хэсэг хэрүүл тэмцэл болсон нь үүний жишээ. Угаасаа л тэр эвлэрэл, нягтрал руу биш эвдрэл, тэмцэл рүү бүхний чирдэг гээд хэлчихэд буруудахгүй. Эрдэнэ гэдэг нэр нь эцэстээ эвдэнэ гэдэг үг болж сонсогдох болжээ.
Үнэн