ИЗНН-ын дарга Б.Батбаатар УИХ-ын гишүүн асан С.Оюунд Ерөнхийлөгчид нэр дэвших санал тавьсан гэдгээ хэвлэлд ярьжээ. 2027 онд болох Ерөнхийлөгчийн сонгуульд УИХ-д суудал авсан намууд нэр дэвшүүлэх эрхтэй. Тэдний нэг нь ИЗНН мөн. Гэхдээ тус намаас Ерөнхийлөгчид нэр дэвшээч гэж санал тавьсан С.Оюун хуулийн шаардлага хангах эсэх нь эргэлзээтэй, бараг боломжгүй гэж ажиглагчид дүгнэж байна. Монгол Улсын Ерөнхийлөгчийн сонгуулийн тухай хуулийг 2020 оны 12 дугаар сарын 24-ний өдөр шинэчлэн баталсан. Хуульд нэр дэвшигч нь:
-50 нас хүрсэн
-Монгол Улсын уугуул иргэн байх
-Сүүлийн таваас доошгүй жил эх орондоо байнга оршин суусан байх
-Банк, бусад хуулийн этгээд, иргэнд шүүхийн шийдвэрээр тогтоогдсон төлбөл зохих зээл, барьцаа болон батлан даалтын өр төлбөргүй байх;
-Татварын хугацаа хэтэрсэн өр төлбөргүй байх, аль нэг компанийн 51 ба түүнээс дээш хувийн хувьцаа эзэмшдэг бол тухайн компани нь албан татварын хугацаа хэтэрсэн өргүй байх;
-Сэтгэцийн эмгэггүй байна гэж заасан байдаг. С.Оюун сүүлийн жилүүдэд БНСУ-д ажиллаж, амьдарч байгаа тухай мэдээлэл хэвлэлээр гарсан. Олон улсын байгууллагад ногоон хөгжлийн чиглэлээр ажиллаж байгаа гэдгээ өөрөө мөн хэлсэн. Эх орондоо байнга оршин суухгүй байгаа учраас хуулийн шаардлага хангахгүй. Хуульд зааснаар эх орондоо 5-аас доошгүй жил байнга оршин суусан байх шалгууртай.
