Ерөнхий сайд Г.Занданшатар төсвийн хөрөнгөөр хайгуул хийж нөөцийг нь тогтоосон стратегийн болон үүсмэл орд болох Ухаа худаг, Тавантолгойн бүлэг ордын Барууннарангийн орд, “Ачит Ихт” компанийн мэдэлд байдаг Эрдэнэтийн зэсийн үүсмэл ордын 60 хувийн өгөөжийг монголчуудад хүртээхээр тохирчээ. Эдгээр ордын өгөөжийн 60-аас доошгүй хувийг Үндэсний баялгийн санд хуримтлуулна. Жилийн өгөөж гэдэгт татвар, төлбөр, хураамж, ногдол ашгийг багтаан тооцож байгаа юм байна.
Үндсэн хуулийн 6-гийн 2-т заасанчлан баялгийн өгөөжийн дийлэнх нь ард түмэнд ногдож, одоо ба ирээдүйн иргэдэд очих анхны шанг Г.Занданшатарын Засгийн газар ийн татлаа. Оюутолгой төслөөс монголчууд 25-хан хувийн өгөөж хүртэж байгааг УИХ-ын сонсголын үеэр олон хүн хэлсэн. Харин эдгээр 4 орд тус бүрээс 60 хуьийн өгөөж хүртэнэ гэдэг бол сайн тохиролцоо, сайн жишиг гэхээс арга байхгүй.
Засгийн газар стратегийн болон үүсмэл ордод төрийн эзэмшлийн хувь хэмжээ тогтоох хэлэлцээртээ баялгийн өгөөжийн дийлэнх нь нийт монголчуудад бодитоор ногдох, хэрэв ордын өгөөж тухайн жилд 60 хувьд хүрээгүй тохиолдолд тохируулгын төлбөр нэмж авахаар тусгажээ. Энэ нь ямар ч тохиолдолд монголчууд Үндэсний баялгийн сангаар дамжуулж эдгээр стратегийн болон үүсмэл ордоос хамгийн багадаа 60 хувийн өгөөж хүртэхээр болж байна гэсэн үг. Хэлэлцээрээр тохирсон санхүүгийн энэхүү загварыг Засгийн газраас УИХ-д өргөн мэдүүлж эцэслэн батлуулна.
Одоогийн Ерөнхий сайд Г.Занданшатар УИХ-ын даргаар ажиллаж байхдаа 2019 онд Үндсэн хуульд нэмэлт, өөрчлөлт оруулж, 6-гийн 2-дахь заалт буюу баялгийн өгөөжийн 60-аас доогүй хувь нь ард түмэнд ногддог байх зарчмыг эцэг хуульд тодотгон оруулж өгсөн. Харин өнөөдөр Ерөнхий сайдын хувиар Үндсэн хуулийн энэ заалтыг амилуулж, Үндэсний баялгийн санг арвижуулж, монгол хүн бүр байгалийн баялагтаа жинхэнэ ёсоор эзэн болох түүхийн шинэ хуудсыг ийн эргүүлж байна. Цаана нь үлдсэн орд газруудад төрийн эзэмшлийн хувь хэмжээ тогтоох хэлэлцээ цаашид ч үргэлжилнэ гэж Засгийн газар мэдэгдлээ.
Үндсэн хуулийн 6-гийн 2 дахь заалтын автор Ерөнхий сайд Г.Занданшатарын стратегийн болон үүсмэл ордуудын өгөөжийн 60 хувийг Үндэсний баялгийн сангаар дамжуулан монгол хүн бүрд хүртээх энэ бодлого, нүүдэл нь баялгийн хараалыг ерөөл болгон хувиргах эерэг үр дагавар авчрах нь гарцаагүй. Эцэг дээдсээс өвлөсөн байгалийн асар их баялгийн өгөөжийг энэ цаг мөчөөс эхлэн монгол хүн бүр хүртэх, эрүүл мэнд, боловсрол, ипотекийн төсөл хөтөлбөрүүдээ урагшлуулах хөгжлийн шинэ боломж юм.
