Бөхийн төрлүүдийн /Чөлөөт, сонгомол бөх/ насанд хүрэгчдийн Ази тивийн аварга шалгаруулах тэмцээн 21 жилийн дараа дахин Монгол Улсад зохион байгуулагдах гэж байна. Тус тэмцээнд дэлхийн бөхийн нэгдсэн холбооны ерөнхийлөгч, Азийн бөхийн холбооны тэргүүн зэрэг 23 орны 250 гаруй тамирчид,100 гаруй шүүгч дасгалжуулагч хүрэлцэн ирэх аж. Монголын чөлөөт бөхийн холбоо Ази тивийн аварга шалгаруулах тэмцээнд ихээхэн ач холбогдол өгч, шаардлагын дагуу чанарын өндөр түвшинд зохион байгуулахаар ажиллаж буй. Тэмцээн энэ сарын 19-24-ний өдрүүдэд үргэжлэнэ гэж Монголын чөлөөт бөхийн холбооноос мэдээллээ.
Монгол Улс 1993 онд Азийн АШТ хүлээж авахад Л.Сэргэлэнбаатар, Ц.Цогтбаяр нар алт, Ц.Хосбаяр, Б.Гантогтох, Б.Баттгтох нар мөнгө, А.Сүхбат, П.Сүхбат, Ц.Баярсайхан нар хүрэл медаль хүртэж багийн дүнгээр хоёрдугаар байрт орж байв. Хамгийн сүүлд 2001 онд АШТ хүлээж авахад Т.Зүүнбаян, Н.Баярмагнай, Г.Өсөхбаяр нар алт, Б.Баятбаяр, Г.Ганхуяг нар мөнгө, Л.Энхбаяр, А.Болдсүх, Н.Бүрэнбаатар нар хүрэл медаль хүртэж, багийн дүнгээр Ираны ард орж байсан юм. Уг нь 1973 онд Монгол Улсад Ази тивийн АШТ болж, тухайн үеийн Азийн чөлөөт бөхийн холбооны албан тушаалтнууд ирж байсан ч сүүлд албан ёсны гэж тооцохоо больсон билээ. Тэрхүү тэмцээнд манайхан 10 жинд бүгдэд нь түрүүлж алтан медаль авсан нь үүнд нөлөөлсөн ч байж магадгүй гэж ярилцдаг билээ.
