УИХ дахь МАН-ын бүлгийн өнөөдрийн хуралдаанд МАН-ын дарга, Ерөнхий сайд Л.Оюун-Эрдэнэ оролцож, нүүрсний хулгайтай холбоотой асуудлаар гишүүдэд мэдээлэл өгсөн байна. Энэ үеэр Ерөнхий сайд Л.Оюун-Эрдэнэ хэрэгт холбогдсон гишүүдээ өөрсдийн хүсэлтээр шалгуулахыг үүрэгджээ. Тухайлбал, нүүрсний хэрэгт холбогдсон таван гишүүн, Хөгжлийн банкны асуудалд холбогдсон УИХ-ын гишүүд, Засгийн газрын сайд нарыг өөрсдийн хүсэлтээр шалгуулах хүсэлтээ өгч шалгуул гэсэн байна. Өнгөрсөн долоо хоногт АТГ-аас Ц.Анандбазар, Ш.Раднаасэд, Ц.Сэргэлэн, Н.Наранбаатар, Б.Баттөмөр гэсэн МАН-ын бүлгийн таван гишүүнийг шууд болон шууд бусаар нүүрсний хулгайтай холбоотойгоор албан тушаал эрх мэдлээ урвуулан ашигласан байж болзошгүй хэмээн үзэж, шалгаж байгаа гэдгээ АТГ мэдээлсэн. Албан бус эх сурвалжуудын мэдээллээр нүүрсний хулгайтай холбогдох МАН-ын гишүүдийн нэрс дээрх таваар тогтохгүй, УИХ-ын гишүүдийн нэрс цаашид нэмэгдэж магадгүй байгаа.
Нүүрсний хулгайтай холбоотой таван гишүүний хувьд өнгөрсөн долоо хоногт АТГ-аас нэрсийг нь зарласны дараа ихэд бухимдаж, намын бүлэг, намын Удирдах зөвлөлөө хуралдуулахыг МАН-ын дарга, Ерөнхий сайд Л.Оюун-Эрдэнэд тавьсан гэсэн мэдээлэл бий. Юутай ч өнөөдөр Ерөнхий сайд Л.Оюун-Эрдэнэ МАН-ын бүлгийн хуралдаанд оролцож, нүүрсний хулгайтай холбоотой нэр нь дурдагдаад байгаа УИХ-ын гишүүд, сайд нарыг өөрсдийн хүсэлтээр шалгуулах ёстой гэсэн сануулгыг бүлгийн гишүүддээ өгчээ.
АТГ өнгөрсөн долоо хоногт нүүрсний хэрэгт шууд болон шууд бусаар нэр холбогдсон улстөрчдийн нэрсийг зарласны эхэнд Ерөнхийлөгч асан Х.Баттулга, түүний Тамгын газрын дарга асан З.Энхболд, Ө.Шижир нар дурдагдсан. Ерөнхийлөгч Х.Баттулга өнгөрсөн пүрэв гарагт АТГ-т мэдүүлэг өгсөн. Харин тэрбээр бямба гарагт гадаадад эмчлүүлэхээр явсан байна. Ийнхүү нүүрсний хэрэгт холбогдсон хамгийн том улстөрч хилийн чанадад гарсныг олон нийт шүүмжилж, эрх мэдэлтнүүд хэрэгт холбогдонгуутаа “өвдөж”, хил давдаг жишиг давтагдлаа гэж байна.
