2022 оны 6 дугаар сарын 26 өприйн ням гарагийн 11:00 цагийн орчим Нийслэлийн Баянгол дүүргийн 11 ээр хорооны “Хувьсгалчид”-ын хоёрдугаар гудамжин буюу МҮОНРТ-ийн зүүн талд байрлах хашаанд байшин барихаар суурийн нүх ухаж байсан хоёр хүн барилгын материалд даруулж нас барсан харамсалтай хэрэг гарчээ. Уг хэргийг нарийвчлан тодруулахаар Баянгол дүүргийн цагдаагийн хэлтсийн холбогдох хүмүүс ажиллаж буй юм байна. Албаны хүмүүсээс авсан мэдээллээр тус хашааг эзэмшдэг иргэний 2 давхар байшинг барихаар ажиллаж байсан иргэд барилгын материалд даруулж нас барсан харамсалтай осол болсон гэнэ. 2 давхар байшингийн суурь цутгах ажлыг гүйцэтгэж байсан Архангай аймгийн Хотонт сумын харьяат иргэн Д /24 настай, эрэгтэй/, Хөвсгөл аймгийн Тосонцэнгэл сумын харьяат иргэн Э /18 настай, эрэгтэй/ нар барилгын суурийн нэг метрийн гүнтэй нүх ухаж байжээ. Уг нүхийг ухахдаа техник ашиглаж байсан бөгөөд тус нүхний ирмэг дээр байсан том оврын суурийн блок нурж дээрх иргэдийг дарсан байна. Үүний улмаас нас барсан гэдгийг цагдаагийн байгууллагын эхний үзлэгээр тогтоожээ.
Барилгын ажил гүйцэтгэж буй хувь хүн, албан байгууллагын хувьд хөдөлмөр хамгааллын наад захын ойлголтыг ажилчдадаа сануулах, бүрэн бүтэн хувцасласан эсэхийг шалгаж байж ажилд оруулах зэргийг холбогдох байгууллагаас анхаарууллаа.
Хөдөлмөр хамгааллын дүрэм журмыг чанд мөрдөөгүй улмаас барилгын орчимд осол гарч иргэд амь насаа алдах эрсдэл өндөр байсаар байна.
