Монгол Улсын хэмжээнд жил бүр зам тээврийн ослоор 450-500 хүн амиа алдаж байна. Дийлэнх осол нь орон нутгийн замд хурд хэвтрүүлсэн, шөнө замд явж байхдаа үүрэглэсэн, шөнө зогсож буй тээврийн хэрэгслийн араас орсон зэрэг осол эзэлдэг байна. Мөн гүйцэт түрүүлэх үйлдлийг давчуу зайд хийсний улмаас осолдож амь насаа алдсан хэрэг олон гардаг талаар Тээврийн цагдаанийн албанаас анхаарууллаа.
Жилд зам тээврийн ослоор амиа алддаг 500 хүний дийлэнх нь зун, намрын цагт орон нутгийн замд амиа алддаг байна. Тухайлбал 2022 он гарсаар 195 хүн зам тээврийн ослын улмаас амиа алдаад байна. Ялангуяа сүүлийн 10 хоногт орон нутгийн замд 15 хүн амиа алджээ. Эдгээр хэргийг аваад үзэхээр дийлэнх нь буюу 90 гаруй хувь нь жолоочийн буруутай үйл ажиллагаанаас болсон гэдгийг замын цагдаагийнхан анхааруулж байна.
Жолооч хурд хэтрүүлсэн, богино зайд гүйцэт түрүүлэх оролдлого хийсний улмаас өөртэйгөө явсан хүмүүсийг амь насыг хохироогоод зогсохгүй, дүрмээрээ явсан жолоочийг хохироож буйг анхаарах хэрэгтэй.
2022 онд зам тээврийн ослоор нас барсан 195 хүний 20 нь хүүхэд байжээ. Жолооч та зам тээврийн ослоос өөрийгөө болон хайртай хүмүүсээ хамгаалж, хурд хэтрүүлэхгүй, дүрэм журмаа баримтлан явахыг тээврийн цагдаагийн газраас анхаарууллаа.
