Японы мэргэжлийн сүмогийн долдугаар сарын тэмцээн Нагоя башё өнөөдөр өндөрлөлөө. Энэ сарын башёд сүмогийн дээд гурван зиндаанд монгол бөхчүүд илүүрхэв. Макүүчи буюу дээд зиндаанд сүмогийн 69 дэх их аварга Хакүхо М.Даваажаргал өвдөг шороодолгүй түрүүллээ. Их аварга өнөөдөр нутгийн дүү, озэки Г.Ган-Эрдэнэтэй учраа таарч барилдсан бөгөөд хоёр бөхийн хэн давсан нь түрүүлэх байсан юм.
Озэки Г.Ган-Эрдэнийн хувьд энэ сард 13 давбал их аварга буюу ёкозүна цол хүртэх болзолтой байсан ч тэрбээр 14 давж, башёгийн сүүлийн өдөр хүртэл түрүүлэх өрсөлдөөнд орж, уг болзлыг давуулан биелүүлсэн юм. "Тэрүнофүжи Эзэн хааны цомыг авбал сайн. Гэхдээ тэр аль хэдийнэ их аварга цолны шаардлагыг хангасан" гэж Японы сүмогийн холбооны шүүгчдийн тэргүүн Исэгахама хэлжээ. Эдүгээ 29 настай Тэрүнофүжи 2015 оны долдугаар сараас 2017 оны есдүгээр сар хүртэл озэки цолтой барилдаж байсан бөгөөд хоёр өвдөгний бэртэл болон хүнд өвчний улмаас карьертаа бараг цэг тавихад хүрсэн юм. Тэрбээр мэргэжлийн сүмогийн тавдугаар зэрэглэлийн жонидан зиндаа хүртэл буусан ч 2019 оны 3-р сараас эхлэн эргэн сэкитори цолоо авч, улмаар дээд зиндаанд хошуучилж, нийт 4 удаа түрүүлээд байгаа юм.
Жюүрёо зиндаанд Миторюү Б.Төрболд 13 даваа, хоёр унаатайгаар түрүүлжээ. Тэрбээр 2017 оны нэгдүгээр сарын Хацу башёгоос эхлэн жюүрёо зиндаанд дэвшин, сэкитори болсон юм. Баасансүрэнгийн Төрболд энэ жил 27 настай. Дундговь аймгийн Адаацаг сумын уугуул. "Нишикидо" дэвжээнд харьяалагддаг бөгөөд 187 см өндөр, 186 кг жинтэй. Б.Төрболд сонирхогчдын сүмо бөхийн ДАШТ-ий хошой аварга, оюутны ёкозүна бөгөөд Тэрүнофүжи, Ичиножо нартай хамт их сүмод элсэн орох боломж байсан ч их сургуулиа төгсөхийг илүүд үзэж хожуу барилдаж эхэлжээ. Сонирхогчдын сүмогийн анхны ёкозүна хэргэмтэй гадаад бөхөөр тодорч байсан Б.Төрболд жюүрёо зиндаанд өмнө нь нэг удаа түрүүлж байсан бөгөөд дээд зиндаанд дэвшин барилдаж байсан юм.
Макүшита зиндаанд баруун жигүүрийн хоёроос босож барилдсан Хокүсэйхо Даваанинж 7-0 даваатайгаар өвдөг шороодолгүй түрүүллээ. Ингэснээр тэрбээр сүмод орсноосоо хойш тасралтгүй качигоши буюу 50-иас дээш хувийн амжилт үзүүлсэн төдийгүй барилдсан бүх 4 зиндаандаа уналгүй 7-0 амжилттай түрүүлсэн сүмоч боллоо. А.Даваанинж ирэх башёгоос сэкитори цолтой барилдана. Ташрамд дурдахад А.Даваанинж Их аварга Даваажаргалын мияагино дэвжээнд харьяалагддаг юм.
