Хуучирч элэгдсэн, хагарч цуурсан шугам хоолойг засварлах ажил жил бүр хийгддэг байсан цаг саяхан. Өөрөөр хэлбэл, засаж сайжруулах ажил жил бүрийн урин дулаан цагтай зэрэгцэн эхэлдэг. Овоолсон шороо, ухсан нүх, зам талбай хааснаас үүдэн нийслэлийн орчны бохирдол тэр хэрээр нэмэгддэг байсан билээ. Иргэдээ цэвэр усаар хангахын төлөө шугам сүлжээний ажлыг ийнхүү хийхээс ч аргагүй байсан цаг саяхан мэт.
Тэгвэл сүүлийн жилүүдэд ухаж сэндийлсэн нүх, овоолсон шороо үүсгэсэн шугам сүлжээний ажил харагдахаа больсноор өнөөх бухимдал алга болсон байна.
Австри улсын RTI компанитай хамтран УСУГ-ын хэрэгжүүлж буй төслийн хүрээнд тус улсын Засгийн газрын 7 сая еврогийн хөнгөлөлттэй зээлээр цэвэр усны шугам сүлжээг шуудуу ухалгүйгээр шинэчлэн засварлах төслийн ажил амжилттай хэрэгжсээр байна.
Төслийг хэрэгжүүлэхээс өмнө шугам доторлох ажлыг гүйцэтгэх баг, ажилчдыг Австри улсын мэргэжлийн инженер, техникийн хамт олон сургаж бэлтгэсэн төдийгүй европ технологийг хэрхэн хэрэгжүүлэхэд ч сайтар суралцсан байна.
Өнөөдөр тэд нийслэлчүүдийнхээ усан хангамжийг сайжруулах, цэвэр тунгалаг усаар хангах ажилд үүрийн таван жингээс үдшийн бүрий тасран, нойрсох цаг хүртэл хүчин зүтгэсээр байгаа билээ. Зарим үед нойр хоолоо умартан ажиллах ч тохиолдол гарна. Тэд ажлаас ухарч, амар хялбарыг харж хайгаагүй учраас л тэр.
Тиймдээ ч үүрийн гэгээ тусахаас өмнө шугам солих ажлын талбар тийш хурдална. Хэрэв ажлын цагтай зэрэгцвэл их хотын гацаа түгжрээнд өдрийн хэдхэн цагийн хэд нь үрэгдэх билээ.
УСУГ-ын баг хамт олон үүргээ ухамсарлан, хийсэн ажлаараа бахархан явна.
