УИХ-ын чуулганы нэгдсэн хуралдааны төрийн ордонд ид явагдаж байна. Чуулганы эхэнд Дарханы замын түр зам дээр гарч буй ослын тухай Зам, Тээврийн Хөгжлийн сайд Л.Халтар мэдээлэл өгөв. Тэрбээр "Тээврийн цагдаагийн албаныхантай ярьж байгаад хоёр, дөрөвдүгээр багцын түр зам дээр цагдаагийн пост ажиллуулж байгаа. Түр зам дээр хурд хэтрүүлэхээс бусад шалтгаанаар замын муугаас болж, иргэд амь нас, эрүүл мэнд, эд материалаараа хохирвол гүйцэтгэгч компани хариуцна. Манай яам гүйцэтгэгч нартай энэ заалтаар гэрээ байгуулсан. Үүнийг ТЦА-аар баталгаажуулаад гүйцэтгэгч компаниас нэхэмжлэх бүрэн боломжтой. Ялангуяа хоёр, дөрөвдүгээр багцын түр зам дээр техникийн бүрэн бүтэн байдал, хурд хэтрүүлснээс бусад тохиолдолд түр замаас шалтгаалан хохирол үүсвэл тээврийн цагдаагийн албаар баталгаажуулан гүйцэтгэгч компаниас хохирол нэхэмжлэх бүрэн боломжтой. Дөрөвдүгээр багцын замыг энэ оны намар ашиглалтад оруулахаар төлөвлөж байгаа" гэлээ.
