Энэ хаврын мод тарих Үндэсний өдөр удахгүй болох гэж байна. Хаврын цэцэрлэгжүүлэлт, ногоон байгууламжийн ажлууд мэдээж эхэлсэн. Гэхдээ энэ жилийн хувьд өмнөх өмнөхөөс өвөрмөц онцлогтой өрнөж байна. Монгол Улсын Ерөнхийлөгч У.Хүрэлсүхийн санаачилсан “Тэрбум мод” үндэсний хөдөлгөөн мод тарих сэдэл, санаачилга, хичээл зүтгэл, хөдөлмөр бүтээл аль алиныг нь урамшуулж, урагшлуулсан том түлхэц болжээ гэж харж байна. Байгаль орчны салбарынхан, тэр дундаа ойн салбарынхан урам зоригтой, урдаа тавьсан зорилттой болж. Иргэд, аж ахуйн нэгжүүдийн идэвх, санаачилга улс үндэстний хэмжээнд өрнөж эхлэв.
Домогт бөх Х.Баянмөнх аварга тарьсан моддоо танилцуулаад, олон нийтийг мод тарихыг уриалж байгааг харах хэчнээн сайхан. УИХ-ын гишүүн байсан эрхэм ганц ч модгүй тал дээр барьсан зусландаа олон арван мод тарьж, бичил төгөл байгуулчихаад, шилмүүст модод тарихад ямар онцлогтой талаар ярьж, зөвлөж, мод тарихын ач холбогдлыг биеэр үлгэрлэн байгаа нь ч бахархмаар үлгэр дууриал.
Зарим суманд л гэхэд ард иргэд нь санаачлан айл өрх бүр хашаандаа мод тарьж, мөн бүхэл бүтэн моносны төгөл байгуулахаар болж, өнгөрсөн намар анхны суулгацуудаа тарьж, өвөл нь хамгаалалтын хашаа барьж, тохижуулсан байх жишээтэй. Аймаг, сум бүрд л ийм ногоон давлагаа үүсжээ. Төгсөгчдийн төгөл, ахмадын цэцэрлэгт хүрээлэн гэх мэтээр ногоон байгууламжаа тэлэх санаачилгууд гарч байгаа аж. Мод тарих амархан, ургуулах нь чухал гэж нэг хэсэг нь цэцэрхэх болсон. Гэтэл ард иргэд үүнийг аль хэдийнэ ойлгож, мэдэж, мэдэрчихжээ. Мод тарихдаа нутаг орондоо дасан зохицсон, тухайн байгалийн бүсэд л ургадаг моддыг сонгох, тухайн орон нутагтаа мод үржүүлгийн газарт ургуулсан тарьц, суулгацыг л тарих нь чухал гэдгийг анхаардаг болж. Модоо хэрхэн зөв технологиор тарьж, зөв арчилж хамгаалж ургуулах вэ гэдэгт санаа тавьдаг болсон байна. Энэ талаар мэргэжлийн хүний зөвлөгөөг авахыг хичээдэг хандлага бий болжээ.
Тэгэхээр энэ хавар “Тэрбум мод” хөдөлгөөн үнэхээр далайцтай, ул суурьтай, уг үндэс сайтай өрнөх нь гэсэн өөдрөг төсөөлөл төрж байна. Үүнд Ерөнхийлөгч У.Хүрэлсүхийн манлайлал ихээхэн нөлөөлсөн байх. Төрийн тэргүүн байгаль экологи, ногоон хөгжил, ойн салбар, ойчдын асуудлаар хэд хэдэн үндэсний чуулганыг ивээл дороо зохион байгуулж, Засгийн газар, УИХ-д чиглэл өгсөн нь дорвитой тэсрэлт, түлхэц болсон бизээ. Тиймээс “Тэрбум мод” үндэсний хөдөлгөөнийг үндэстний хэмжээний ногоон давлагаа гэж нэрлэмээр санагдана. Энэ давлагаа улам хүчээ авах нь дамжиггүй.
