Тээврийн хэрэгслийн улсын дугаар олгохыг хязгаарлах журмыг цуцлуулахаар гарын үсэг цуглуулж эхэллээ. Одоогийн байдлаар 2087 хүн дэмжиж гарын үсэг зураад байна. Гарын үсэг зурах хугацаа 21 хоногийн дараа дуусна. Хэрэв та дэмжиж байвал энэхүү холбоос дээр дарна уу.
Өргөдөлд: Монгол Улсын иргэн Дашмягмар овогтой Галсанцэрэн миний бие Улаанбаатар хотод тээврийн хэрэгслийн улсын дугаар олгохыг хязгаарласан журмыг хэрэгжүүлж байгаа нь Монгол Улсын Үндсэн хуулиар баталгаажуулсан иргэний өмчлөх эрх, түүнийг төрөөс хамгаалах үүрэгтэй холбоотой зохицуулалттай нийцэж байгаа эсэхэд үндэслэлтэй эргэлзээ үүсгэж байна гэж үзэж, уг журмыг хүчингүй болгуулах асуудлыг холбогдох эрх бүхий байгууллагаар хэлэлцүүлэх хүсэлтийг гаргаж байна. Энэхүү хүсэлтийг дараах үндэслэлээр гаргаж байна. Монгол Улсын Үндсэн хуульд иргэн өмчтэй байх эрхтэй бөгөөд төр энэ эрхийг хамгаалах үүрэгтэй гэж заасан. Автотээврийн хэрэгслийг хууль ёсоор өмчилсөн боловч улсын дугаар олгохгүй байх нь тухайн өмчийг зориулалтын дагуу ашиглах боломжийг бодитоор хязгаарлаж байна гэж үзэж байна. Улаанбаатар хотын замын түгжрэлийг бууруулах зорилгоор олон жилийн хугацаанд төрөл бүрийн арга хэмжээ хэрэгжүүлсэн боловч түгжрэлийг мэдэгдэхүйц бууруулсан тогтвортой үр дүн хараахан гараагүй. Ийм нөхцөлд улсын дугаар олгохыг хязгаарлах арга хэмжээний бодит үр нөлөөг дахин үнэлэх шаардлагатай. Улсын дугаар олгохыг хязгаарлах нь тээврийн хэрэгслийн импортыг өөрөө хязгаарлаж байгаа хэрэг биш бөгөөд автомашины тоо өсөхөд нөлөөлж буй үндсэн хүчин зүйлсийг бүрэн шийдвэрлэхгүй байна. Журмыг хэрэгжүүлж эхэлснээс хойш улсын дугаартай автомашины эрэлт, үнэ өсөж, улсын дугаарын үнэ зах зээл дээр хөөрөгдөх нөхцөл бүрдсэн талаар олон нийтэд өргөнөөр яригдаж байна. Үүнтэй холбоотой хууль бус худалдаа, зуучлал үүссэн эсэхийг эрх бүхий байгууллагаар шалгаж, бодит нөхцөл байдлыг тогтоох шаардлагатай гэж үзэж байна. Улаанбаатар хотын улсын бүртгэлээс жил бүр хэдэн тээврийн хэрэгсэл хасагддаг талаарх албан ёсны нээлттэй статистик мэдээлэл хангалтгүй. Иймээс улсын дугаарын нийт эргэлт, шинээр олгож буй дугаарын бодлогыг ямар тооцоо, судалгаанд үндэслэн хэрэгжүүлж байгаа нь олон нийтэд тодорхой бус байна. Монгол Улсын хүн ам өсөхийн хэрээр өрхийн хэрэгцээ, бизнесийн үйл ажиллагаа, үйлчилгээний салбарын хөгжилтэй холбоотойгоор хувийн тээврийн хэрэгслийн хэрэгцээ мөн нэмэгдсээр. Ийм нөхцөл байдлыг бодлого боловсруулахдаа харгалзан үзэх шаардлагатай. Улсын дугаарын хомсдол нь автомашины зах зээлийн үнэд нөлөөлж, иргэдийн худалдан авах боломжийг бууруулж байна. Мөн нийтийн тээврийн хүртээмж, эрүүл мэндийн үйлчилгээний хүртээмж, цаг агаарын онцлог зэрэг нөхцөлөөс шалтгаалан олон иргэний хувьд хувийн тээврийн хэрэгсэл ашиглах нь бодит хэрэгцээ болсон. Иймд дээрх үндэслэлүүдийг харгалзан үзэж, "Улаанбаатар хотод тээврийн хэрэгслийн улсын дугаар олгохыг хязгаарлах журам"-ын хууль зүйн үндэслэл, хэрэгжилт, үр нөлөөг дахин нягтлан шалгаж, шаардлагатай тохиолдолд хүчингүй болгох асуудлыг судлан шийдвэрлэх ажлын хэсэг байгуулж ажиллуулахыг хүсэж байна.
