Цагдаагийн албан хаагч үүрэг гүйцэтгэж байхдаа иргэн рүү гал нээсэн тухай мэдээлэл өнгөрөгч амралтын өдөр нийгмийн сүлжээнд тарсан. Тэгвэл энэ талаар цагдаагийн байгууллагаас тайлбар өглөө. Чингэлтэй дүүргийн Цагдаагийн газрын дарга Т.Баатарын хэлснээр "2026 оны дөрөвдүгээр сарын 18- 19-нд шилжих шөнийн 01:56 цагт Чингэлтэй дүүргийн нэгдүгээр хороо, 23 дугаар сургуулийн орчимд "Согтуу хүмүүс амгалан тайван байдал алдагдуулж байна" гэх дуудлага бүртгэгджээ. Дуудлагын дагуу алба хаагчдыг очиход дөрвөн иргэн маргалдаж, нэг нь газарт унасан байдалтай байсан тул хууль ёсны шаардлага тавьсан. Гэвч иргэд цагдаагийн алба хаагч болон дуудлага өгсөн иргэний шаардлагыг удаа дараа эсэргүүцсэн. Алба хаагчийн зүгээс үйлдэж буй зөрчлөө зогсоох шаардлагыг нийт таван удаа тавьсан боловч биелүүлээгүй бөгөөд нэмэлт эргүүл ирэх үед цагдаагийн биед халдсан байна. Иймд Цагдаагийн албаны тухай хуулийн 51.4-т заасны дагуу аргагүй хамгаалалт хийж, нэг удаа резинэн сумтай буу хэрэглэсэн. Тухайн иргэнд 103-ын яаралтай тусламж үзүүлсэн. Одоогоор Зөрчлийн тухай хуулиар шалгаж байна.Цагдаагийн алба хаагчийн хувцас хэрэглэлийг гэмтээж, нүүрэнд нь шарх учруулсан тул "Төрийн албан хаагчийн биед халдсан, хүч хэрэглэсэн" гэх үндэслэлээр эрүүгийн хэрэг хянан шийдвэрлэх ажиллагаа явуулж байгаа" гэлээ.
