УИХ-ын гишүүн, Эдийн засаг, хөгжлийн сайд асан Л.Гантөмөр Ардчилсан намын дотоод сонгууль болон Ерөнхийлөгчийн сонгуулийн талаар өөрийн байр сууриа илэрхийллээ. Тэрбээр "Ардчилсан нам гишүүдийнхээ шинэчилсэн бүртгэлийг хийж байна. Үүнийг би хувьдаа цаг үеэ олсон ажил гэж харж байгаа. Гишүүдийн шинэчилсэн бүртгэлийн дараа бүх шатны сонгууль явах ёстой. Энэ сонгууль шударга яваасай гэж хүсэж байна. Сонгуулийн үр дүнд тодорхой хүмүүс ялалт байгуулна. Зарим нь ялагдана. Эцэст нь эв нэгдлээ авч үлдэх нь хамгийн чухал. Үүнийг Ардчилсан намын гишүүн бүрд хэлдэг. Хүн бүрт УИХ-д нэр дэвших боломж олддоггүй. Өнгөрсөн сонгуулиар гэхэд 126 хүнийг дэвшүүлсний 100 гаруй нь миний гомдогсод болж үлдсэн. Яагаад гэвэл энэ чинь тоотой.
АН дотор Ерөнхийлөгчид хэн нэр дэвших вэ гэдэг асуудал яригдаж байгаа. Генералын вагон мөрөөддөггүй цэрэг байдаггүй гэдэг. Улс төрд эцсээ хүртэл ажиллана гээд явж байгаа хүмүүс бүгд л өрсөлдөөнд орно. Намын дарга байсан хүний хувьд өрсөлдөөнд орж байгаа хүмүүсээ хамгаалах нь миний үүрэг гэж харж байгаа. Түүнээс биш бид алаагүй баавгайн арьсыг эрт хувааж болохгүй. Тиймээс эв нэгдлийг сахих нь Ардчилсан намын хувьд ирэх сонгуулийн журамт үүрэг. Намын дотоод хэлэлцүүлгийг хэзээ эхлүүлж, дуусгах нь намын дарга нарын асуудал. Миний хувьд өрсөлдөөнд ороход бэлэн байгаа. Харин бусдыгаа харлуулах ч юм уу, буруу үйл рүү халтирахгүй байгаасай" гэв.
