Насандаа баймгүй эр зориг, баатарлаг үйлдэл гарган, гэр бүлийнхнийхээ амийг аварсан 13 насиай австрали хүүг дэлхийн хэвлэлүүд магтаж байна.
Тодруулбал, Austin Appelbee хэмээх 13 настай хүү ээж, дүү нарынхаа хамт Австралийн баруун эргийн далайд каяк болон тэшүүрт самбараар аялж байх үед хүчтэй салхи, давалгаанд туугдан эргээс холдсон байна. Нөхцөл байдал улам хүндэрч эргээс холдох үед хүү эрэг рүү ганцаараа сэлж тусламж дуудах шийдэлд хүрчээ.
Хүү ойролцоогоор 4 цагийн турш, хэдэн километр зайг туулан сэлсний эцэст эрэгт хүрч, бусдаас тусламж хүссэн байна. Түүний дуудлагын дагуу аврагчид нисдэг тэрэг, завиар эрэн хайх ажиллагаа явуулж, далайд үлдсэн ээж болон дүү нарыг эсэн мэнд олж аварчээ.
Аврагдсан гэр бүлийнхэн ноцтой гэмтэл аваагүй ч удаан хугацаанд далайд байсан тул ядарч сульдсан байдалтай байсан аж. Харин 13 настай хүүгийн зориг, тэсвэр тэвчээрийг аврагчид болон олон нийт “баатарлаг үйлдэл” хэмээн өндөр үнэлж байна.
