Улсын Их Хурлын Төсвийн байнгын хорооны 12 дугаар сарын 26-ны өдөр хэлэлцсэн үл хөдлөх хөрөнгө борлуулахад төлдөг 2 хувийн татварыг хүчингүй болгох асуудлаар хуулийн төсөл санаачлах тухай нийтийн өргөдлийн талаарх санал, дүгнэлтийг хэлэлцсэн. Байнгын хорооны саналын дагуу Засгийн газарт чиглэл өгөх тухай УИХ-ын тогтоолын төсөлд санал хураалт явуулсан ч дэмжигдээгүй байна.
Үүний улмаас УИХ-ын дэгийн тухай хуулийн дагуу УИХ-ын даргын захирамжаар хуулийн төсөл боловсруулах ажлын хэсэг байгуулахаар шийдвэрлэсэн. Тус ажлын хэсгийг УИХ-ын гишүүн Ж.Бат-Эрдэнэ ахлах бөгөөд гишүүдээр Р.Сэддорж, Ц.Баатархүү, Б.Батбаатар, П.Батчимэг, Э.Болормаа, Х.Жангабыл, Г.Лувсанжамц, С.Лүндэг, Ц.Туваан, Л.Энхнасан нар багтжээ. Ажлын хэсгийн гол үүрэг нь үл хөдлөх хөрөнгө борлуулахад ногдуулдаг 2 хувийн албан татварыг хүчингүй болгох асуудлыг судалж, холбогдох хуулийн төслийг боловсруулах юм.
