Засвар, механикийн завод импорт орлох бүтээгдэхүүний нэр төрөл, үйлдвэрлэлийн хэмжээг нэмэгдүүлэх, өртгийг бууруулах, борлуулалтын орлогыг өсгөх, улмаар өрсөлдөх чадвараа дээшлүүлэх зорилгоор өргөтгөл шинэчлэлийн ажлыг үе шаттай хэрэгжүүлж байгаагийн нэг нь Цутгуурын цехийн Хайлах хэсгийн Илчийн боловсруулалтын тасгийн өргөтгөл юм. Одоогоор барилга байгууламжийн ажил дуусаж, Улсын комисст хүлээлгэх бэлтгэл хангагдаж байна. Тоног төхөөрөмжүүд бүх шугам дээр бүрэн нийлүүлэгдсэн бөгөөд Засвар, угсралтын цехийн ажилчид угсралтын ажлыг гүйцэтгэж байна. Одоогоор тоног төхөөрөмжийн угсралт 50 орчим хувийн гүйцэтгэлтэй явааг Цутгуурын цехийн дарга Б.Бат-Эрдэнэ мэдээллээ.
Илчийн боловсруулалтын тасгийн өргөтгөлийн тоног төхөөрөмжийн эхний ээлжийн угсралтыг энэ сарын сүүлчээр дуусгах төлөвлөгөөтэй ажиллаж байна. Тус тасагт өргөтгөл хийснээр Цутгуурын цехийн бүтээгдэхүүн үйлдвэрлэлийн хэмжээ 1800 тонноор нэмэгдэж, жилд 7000 тонн бүтээгдэхүүн үйлдвэрлэх боломж бүрдэх юм.
