Үндсэн хууль зөрчигдсөн талаар Үндсэн хуулийн цэцэд хандаж ирүүлсэн хүсэлтийн дагуу УИХ-ын дэд дарга Х.Булгантуяа Монгол Улсын Үндсэн хуулийн Дөчин гуравдугаар зүйлийн 1, Далдугаар зүйлийн 1 дэх хэсгийг зөрчсөн эсэх асуудлаар Үндсэн хуулийн цэцэд маргаан хянан шийдвэрлэх ажиллагаа шууд үүсгэн шалгаж эхэлснийг Үндсэн хуулийн цэцээс албан ёсоор мэдээллээ. Үндсэн хуулийн цэцэд маргаан хянан шийдвэрлэх ажиллагааны тухай хуулийн 21 дүгээр зүйлийн 3 дахь хэсэгт “Цэцэд хандах эрх бүхий байгууллага, албан тушаалтнаас гаргасан хүсэлтийг хүлээн авсан Цэцийн гишүүн маргаан шууд үүсгэж шалгана” гэж хуульчилсан байдаг. Ингэснээр УИХ-ын дэд дарга Х.Булгантуяа Үндсэн хууль зөрчсөн эсэх талаар шалгуулж эхэллээ гэсэн үг. Үндсэн хуулийн цэцээс Үндсэн хууль зөрсөн гэж үзвэл УИХ-ын гишүүнээс эгүүлэн татагдах нөхцөл бүрдэнэ. Ерөнхий сайдыг огцруулах санал гаргасан УИХ-ын нэр бүхий гишүүд гэнэтхэн огцруулахгүй гэж санал өгсөн, хуралдаан даргалагч Х.Булгантуяа илтэд нэг талыг барьсан, Үндсэн хуулийн цэцийн хараат бус байдал руу халдсан мэдэгдэл хийсэн нь ийм үр дагаварт хүргэсэн бололтой.
