“Эрдэнэт үйлдвэр их хэмжээний мөнгөөр гарын болон эдийн саван, шампунь худалдан авах тендер зарлажээ” гэх мэдээлэл цахим орчинд нийтлэгдсэн. Энэ талаар захиалагч болох Эрдэнэт үйлдвэрийн Хөдөлмөрийн аюулгүй байдал, эрүүл ахуйн хэлтсийн Эрүүл ахуйн товчооны хөдөлмөрийн эрүүл ахуйч О.Орхончимэгээс тодруулсан юм.
-Өнгөрсөн онд хөдөлмөрийн эрүүл ахуйн чиглэлээр ямар томоохон ажлууд хэрэгжсэн бэ?
-Манай чиглэлээр дөрвөн томоохон хөтөлбөр хэрэгжиж байна. Үүнд амьсгал хамгаалах, сонсгол хамгаалах, эргономикийн, сэтгэл зүйн болон эрүүл мэндийн дунд хугацааны хөтөлбөрүүд багтдаг. Эдгээр хөтөлбөрүүдийн үр дүнд хүний эрүүл мэндэд сөргөөр нөлөөлж буй хүчин зүйлсийн үйлчлэлийг бууруулах олон ажил хийгдсэн. Судалгааны дүнгээс харахад ажилтнуудын сэтгэл ханамж харьцангуй өндөр байгаа. Мөн сэтгэл зүйн эрүүл мэндийн өдөрлөгүүд, модуль сургалтууд зохион байгуулж, бүлгийн уулзалт, ганцаарчилсан зөвлөгөө, сэтгэл заслын үйлчилгээ, иог бясалгал зэрэг олон төрлийн арга хэмжээг үр дүнтэй хэрэгжүүлсэн.
-Эрдэнэт үйлдвэр 400 гаруй сая төгрөгөөр гарын болон эдийн саван худалдан авах тендер зарласан гэх мэдээлэлд та ямар тайлбар өгөх вэ?
-Хөдөлмөрийн эрүүл ахуй гэдэг бол ажилчдад олгодог савангаар хязгаарлагдах ойлголт биш. Ажлын байр, орчны цэвэрлэгээ, ариутгал, халдваргүйтгэл гээд олон хүчин зүйлээс хамаардаг. Тэр дундаа ажилтнуудын эрүүл ахуй нэн чухал. Бид ажилтнуудаа гарын болон эдийн саван, цэвэрлэгээний болон халдваргүйтгэлийн бодисоор тогтмол хангах үүрэгтэй. Өнгөрсөн онд худалдан авалтын үйл ажиллагаанаас үүдэлтэй тасалдал үүссэнээс шалтгаалан ажлын байрны эрүүл ахуй алдагдах эрсдэл бий болж, ажилчдаас гомдол ч нэлээд гарсан. Энэ удаад бүх төрлийн саван, цэвэрлэгээ, ариутгал, халдваргүйтгэлийн бодис, ахуйн хэрэглээний бараа бүтээгдэхүүнүүдийг нэг дор багцлан худалдан авах тендер зарлаж байгаа юм билээ. Саван гэхэд л эдийн саван, гарын саван, эмнэлгийн зориулалтын ариутгалын шингэн саван гээд олон төрөлтэй. Түүнээс гадна зочид буудал, “Сэлэнгэ” амралт, Хүүхдийн асрамжийн “Энэрэл” төв зэрэг нийгмийн цех, нэгжүүдийн ахуйн хэрэглээний бүтээгдэхүүнүүд мөн багтсан. Шампунь, ангижруулагчаас эхлээд, бүх төрлийн угаалга, ариутгал, халдваргүйтгэлийн бодис… Иймээс худалдан авалтын нийт үнийн дүн мэдээж өндөр харагдаж байгаа
-Хэвийн бус нөхцөлд хэчнээн хүн ажилладаг вэ? Тэдэнд жилд хэчнээн саван олгодог вэ?
-Эрдэнэт үйлдвэрт хэвийн бус нөхцөлд ажилладаг 4500 ажилтан бий. Бид жилдээ зөвхөн гарын саван гэхэд 45 мянган ширхэг захиалж авдаг. Өөрөөр хэлбэл, нэг ажилтанд сард дунджаар нэг ширхэг гарын саван олгодог гэсэн үг. Үүнээс гадна гарын хүйтний эсрэг тос, гарын хамгаалалтын тос, цэвэрлэгээний тос зэрэг бүтээгдэхүүнүүд бий. Эдгээр нь худалдан авалтын нэг багцад хамрагддаг. Худалдан авалтын үйл ажиллагаа ERP системээр явагддаг бөгөөд каталогууд үүсгэгдсэн. Эрдэнэт үйлдвэрийн бүтцийн нэгжүүд уг каталогоос өөрсдийн хэрэгцээ шаардлагад нийцүүлэн захиалгаа хийдэг.
