Хүний эрхийн Үндэсний Комиссын захиалгаар Бодлогын Инновацын Хүрээлэн гүйцэтгэж буй “Нийслэл дэх шилжилт хөдөлгөөн, шилжин суурьшигчдад тулгамдсан хүний эрхийн асуудал” судалгааны урьдчилсан дүнг танилцуулах хэлэлцүүлэг өнөөдөр /2025.11.14/ зохион байгуулагдлаа.
Судалгааг тоон болон чанарын аргыг хослуулан гүйцэтгэсэн бөгөөд 2023–2025 онд орон нутгаас Улаанбаатар хотод шилжин ирсэн 407 иргэнээс 56 асуулт бүхий анкетын судалгаа авч, төрийн байгууллагын төлөөлөл болон шилжин ирэгсдийг хамарсан 30 оролцогчтой ганцаарчилсан ярилцлага хийсэн юм.
Шилжих хөдөлгөөний гол шалтгаан нь ажил эрхлэх, амьдрах орчин, нөхцлөө сайжруулах, боловсрол, эрүүл мэндийн чанартай тусламж үйлчилгээнд хамрагдах бөгөөд хөдөлмөрийн насныхан хамгийн ихээр нүүдэллэж байна. Гэвч оршин суух хаягийн бүртгэлийн хүндрэл, хууль эрх зүйн зохицуулалтын зөрчил, үйлчилгээний мэдээллийн хомсдол нь шилжин суурьшигчдын эрүүл мэнд, боловсрол, нийгмийн хамгааллын үйлчилгээ авах Үндсэн хуулиар баталгаажсан эрхээ эдлэх боломжийг хязгаарлаж байна.
Түүнчлэн төвлөрлийг сааруулах бодлого үр дүнтэй хэрэгжихгүй байгаагаас нийслэлд хүн амын хэт төвлөрөл бий болгож, нийгмийн суурь үйлчилгээний ачааллыг улам нэмэгдүүлж, хүний эрхийн зөрчлийг үүсгэж байгаа нь судалгааны дүнгээс харагдав.
Хэлэлцүүлэгт холбогдох яамд, НИТХ-ын Ажлын алба, дүүрэг, хороодын Тамгын газар, олон улсын болон иргэний нийгмийн байгууллагуудын төлөөлөл зэрэг 32 байгууллагын 40 гаруй албан тушаалтан, судлаач, иргэд оролцож, судалгааны урьдчилсан үр дүн болон тулгамдсан асуудлын талаар байр сууриа илэрхийлж хэлэлцүүлэг өрнүүллээ.
