-Засвар механикийн заводын 2025 онд бүтээсэн амжилт, ажлын үзүүлэлтийг онцолъё. 47 дахь жилтэйгээ золгож буй үйлдвэрийн төрсөн өдөрт танай хамт олны барих бэлэг юу бол?
-Засвар, механикийн заводын хувьд 2025 он, үйлдвэрлэлийн төлөвлөгөөт үзүүлэлтүүд биелсэн үр өгөөжтэй жил боллоо. Үндсэн үйлдвэрлэл хэвийн, тасралтгүй ажилласан. Харин зарим ханган нийлүүлэлт оройтож, удаашрах тохиолдол байсан ч бид цаг тухайд нь шийдвэрлэж ажилласны үр дүнд сүүлийн саруудад зарим үзүүлэлт дээр нөхөх боломж бүрдүүлж чадлаа. Ингээд бид тэмдэглэлт ойн өдрөө төлөвлөгөө, зорилтоо биелүүлсэн амжилтаар угтаж байна.
-Импорт орлох бүтээгдэхүүн үйлдвэрлэж, дотоод нөөц бололцоогоо бүрэн дүүрэн ашиглах нь танай хамт олны өмнө тавигддаг чухал зорилтын нэг. Тэгвэл энэ зорилт өнөөдөр ямар түвшинд хэрэгжиж байна вэ?
-2009 оноос бид дотооддоо импорт орлох бүтээгдэхүүн үйлдвэрлэх зорилтыг тов тодорхой дэвшүүлэн, хэрэгжүүлж эхэлсэн. Одоо ч энэ чиглэлээр төлөвлөгөөт ажлуудаа хийж байна. Өнгөрсөн оны үйлдвэрийн тайлан балансын үеэр Засвар, механикийн заводод үйлдвэрлэж буй 130 орчим тэрбум төгрөгийн бүтээгдэхүүн бүхэн импорт орлох бүтээгдэхүүн болдог гэдгийг миний бие онцолж байлаа. Үүнийг одоо ч бас дахин хэлье. Учир нь манайхтай ижил төстэй Оюу толгойн үйлдвэр шаардлагатай тоног төхөөрөмж, сэлбэг хэрэгслийг гаднаас импортоор авч байна. Харин манай үйлдвэрийн хувьд бүхэл бүтэн Засвар, механикийн заводыг дэргэдээ ажиллуулж байгаа учраас бүхий л засвар сэлбэлт, импорт орлох бүтээгдэхүүн үйлдвэрлэлийг хийж байгаа нь том давуу тал юм. Түүнчлэн, манайх бусад ижил төстэй үйлдвэр, уул уурхайн салбарт бүтээгдэхүүнээ нийлүүлэх чиглэлээр шинэ шатанд гаргахаар зорьж байна. Саяхан манай инженер, мэргэжилтнүүд Оюу толгой, Эрдэнэс таван толгой зэрэг үйлдвэрт очиж ажиллаад ирсэн. Энэ үеэр манай заводод үйлдвэрлэж буй бүтээгдэхүүний эрэлт хэрэгцээг улсын хэмжээнд нэмэгдүүлэх, бусад үйлдвэрүүдэд нийлүүлэх өргөн боломж байгааг олж харлаа. Мэдээж, энд хууль эрх зүйн орчныг өөрчлөн, сайжруулах шаардлага зүй ёсоор тавигдана.
-Засвар, механикийн заводод Механик цех, Цутгуурын цехийн гээд хэд хэдэн томоохон өргөтгөл шинэчлэл, бүтээн байгуулалтын ажил өрнөж байгаа. Өнөөдрийн байдлаар, явц хэрхэн үргэлжилж, шинэ өргөтгөлүүд хэзээ ашиглалтад орох төлөвлөгөөтэй байна вэ?
-Цутгуурын цехийн барилгын ажил бүрэн дуусаж, дотоод тоног төхөөрөмжийн суурилуулалт, угсралт ид хийгдэж байна. Барилга байгууламжийг улсын комисст хүлээлгэж өгөхөд бэлэн болсон гэсэн үг. Ирэх онд Цутгуурын цехийн өргөтгөлийг бүрэн ашиглалтад оруулахаар төлөвлөж байна. Механик цехийн өргөтгөлийн барилгын ажлын тендер шалгаруулалт зарлагдсан. Барилгын ажлын гүйцэтгэгч шалгарсны дараа ирэх хавар өргөтгөлийг эхлүүлж, 2027 оны сүүлчээр бүрэн дуусган, ашиглалтад хүлээж авахаар төлөвлөөд байна.
-Өргөтгөл шинэчлэлийн үйлдвэрлэл болоод эдийн засагт өгөх үр ашиг юу вэ?
-Цутгуурын цех жилд 6000 тонн цутгамал бүтээгдэхүүн үйлдвэрлэх хүчин чадалтай байсан бол шинэ өргөтгөлийн үр дүнд 7000 тонн болж өснө. Өөрөөр хэлбэл, Цутгуурын цехэд өмнө нь хийсэн хоёр үе шаттай өргөтгөлөөс гадна эцсийн буюу бүтээгдэхүүнээ цэвэрлэж, хатаах, дулааны боловсруулалт хийж гаргадаг дамжлага дээр үйлдвэрлэл 1000-1500 тонноор нэмэгдэнэ. Энэ хэрээр эдийн засгийн үр өгөөж, бүтээмж дээшлэх юм.
-Машин үйлдвэрлэлийн цогцолбор төв болгон хөгжүүлэх нь Засвар, механикийн заводын ирээдүй гэж тодорхойлж байгаа. Энэ зорилт ойрын төлөвлөгөөнд хэрхэн тусгагдаж байна вэ?
-Машин үйлдвэрлэлийн төв гэдэг нь өнөөдрийн манай заводын үйлдвэрлэж байгаа сэлбэг хэрэгсэл, эд анги, тоног төхөөрөмжийн бүтээгдэхүүн, тэдгээрийн засвар үйлчилгээний нэр төрөл, чанар, нийлүүлэлт нэмэгдэж, илүү өргөн хүрээнд хөгжинө гэсэн тодорхойлолт. Зөвхөн уул уурхай, ижил төстэй үйлдвэр төдийгүй хөдөө аж ахуй зэрэг бусад салбарт ч хэрэгцээ шаардлагатай тоног төхөөрөмжийг үйлдвэрлэж, нийлүүлэх зорилготой. Ер нь суурилагдсан хүчин чадал сайтай засварын завод учраас дээрх боломж манайд бүрэн бий. Энэ зорилтоо хэрэгжүүлэхийн тулд манай цех, хамт олон ирэх жилүүдэд хичээн ажиллах болно.
