Гэр хорооллын айл өрхүүд 100 литр ус аваад 200 төгрөгийг төлдөг. Гэтэл 100 литр усыг хэрэглэгчийн гарт хүргэх зардал 4000 төгрөг. Энэ хоёр тоог харьцуулж хараад танд юу бодогдож байна вэ. Товчхондоо ус худалдан борлуулахад олох орлого, иргэдэд усыг нь хүргэж өгөхөд гарах зардал хоёр хоорондоо тэнгэр газар мэт зөрүүтэй байна.
УСУГ нь нийслэлийн 6 дүүрэгт 700 гаруй худгаар дамжуулан иргэдэдэд ундны усыг нь хүргэдэг. Эдгээр худгуудаас 331 нь шугам сүлжээнд холбогдсон буюу хэрэглэгчдэд усыг нь шууд хүргэдэг бөгөөд үлдсэн нь зөөврийн худаг юм. Гэхдээ шугам сүлжээнд холбогдсон болон зөөврийн худгийн усны гарах зардал төдийлэн ялгаатай биш ойролцоо байдаг юм байна.
Зөвхөн гэр хороолол гэлтгүй орон сууцны иргэдэд ус хүргэх зардал ч алдагдалтай явдаг. Тодруулбал, орон сууцны айлууд усаа литр тутамд 1 төгрөг 35 мөнгөөр худалдан авдаг бөгөөд эндээс УСУГ литр тутамд 10-15 төгрөгийн алдагдал хүлээдэг гэсэн тооцоо бий.
Ийм нөхцөл байдлын улмаас олон жил алдагдалтай ажилласан УСУГ төсөл хөтөлбөрүүдээр санхүүжилтээ зохицуулж урд хормойгоо хойд хормойгоороо нөхсөөр өдгөөг хүрчээ. Өөрөөр хэлбэл төсөл хөтөлбөрүүдийн санхүүжилт байхгүй бол литр тутмаасаа алдагдалтай ажилладаг, ус түгээгээд олох биш алддаг УСУГ-ынхан хэдийнэ хаалгаа барих байсан гэсэн үг. Олон жил алдагдалтай ажилласаар, алдагдлаа нөхөж чадалгүй явсаар ирсэн тус байгууллага санхүүгийн хувьд хүнд байдалд орж ажилчдынхаа цалин хөлсийг нэмэх ч боломжгүйд хүрээд байгаагаа дуулгалаа.
Таван тонны хэмжээтэй 10 мянган төгрөгийн үнэ бүхий усыг зөөврийн худагт хүргэх автомашины шатахуун, жолооч болон бусад хүний цалин гээд тооцохоор УСУГ ямар хэмжээний зардал гарган байж литр нь 2хон төгрөгийн үнэтэй усыг иргэдэд хүргэдэг нь ойлгогдох биз ээ.
Монголчууд бид усыг "ЦЭНХЭР АЛТ" гэж өргөмжилдөг, амьдралд тустай, үнэтэй цэнэтэйг нь гайхдаг. Гэхдээ үнэхээр л цэнхэр алт л юм бол тэр АЛТ чинь үнэгүйджээ. Үнэгүйдсэн болохоор усаа хайрлах, гамнах ойлголт ч иргэдийн дунд маруухан байна. Том өргөмжлөлтэй ч жижигхээн үнэлгээтэй, хөөрхий УС өртгөөсөө 20 дахин бага зардлаар ТАНЫ, БИДНИЙ амьдралыг тэтгэхээр өдөр бүр ХАМТ байгаа, байсаар ч ирсэн. Харин урдахаа хойдохоороо нөхсөн, арга ядсан энэ байдлаар цаашид хэр удаан явах бол?
