УИХ-ын дарга Д.Амарбаясгалан өчигдөр мэдээлэл хийх үеэрээ Авлигатай тэмцэх газар /АТГ/-тай холбогдох хэд хэдэн ноцтой асуудлыг мэдээлсэн. Тэгвэл уг мэдээлэлтэй холбоотойгоор АТГ-аас мэдэгдэл гаргасан байна.
Тус мэдэгдэлд "УИХ-ын дарга Д.Амарбаясгалан 2025 оны есдүгээр сарын 25-ны өдөр хэвлэлийн хурал хийх үеэрээ "…Өчигдөр орой 19.30 цагт АТГ 20 байцаагчийг цуглуулаад та нар Амарбаясгалангийн талд санал өгөх гэж байгаа Бага хурлын гишүүдийг 20, 20-иор нь жагсааж байгаад бүгдэд нь түүх үүсгэж байгаад шалгах гэж үзсэн. Энэ тухай намын ерөнхий нарийн бичгийн дарга Я.Содбаатарт хэлсэн. Түүний дараагаар АТГ бүх зүйлээ устгасан, зогсоосон" гэх утгатай илт үндэслэлгүй худал зүйлийг олон нийтэд мэдэгдлээ.
Авлигын эсрэг хуулийн 16 дугаар зүйлийн 16.2-т "Аливаа албан тушаалтан, хувь хүн, хуулийн этгээд Авлигатай тэмцэх газрын үйл ажиллагаанд нөлөөлөх, хөндлөнгөөс оролцохыг хориглоно" гэж заасан бөгөөд УИХ-ын даргын дээрх мэдэгдэл нь АТГ-ын үйл ажиллагаанд хөндлөнгөөс нөлөөлөх оролдлого хэмээн үзэж байна. АТГ-ын удирдлага нь албан хаагчиддаа улс төрийн намын дотоод асуудал, сонгуультай холбогдуулан тодорхой зорилго бүхий үйлдэл, үйл ажиллагаа хийх талаар үүрэг чиглэл өгөөгүй болохыг хариуцлагатайгаар мэдэгдье.
АТГ нь Авлигын эсрэг хуульд заасан хууль дээдлэх, хараат бус, ил тод байх зарчмыг чанд баримтлан ажилладаг бөгөөд бие даасан төрийн тусгай байгууллагыг улс төрийн намын дотоод асуудалдаа хамаатуулж татан оролцуулах санаархал, Эрүүгийн хуульд заасан харьяаллын гэмт хэргийг шалгаж буй ажиллагааг улстөржүүлэх үйлдлээ зогсоохыг Та бүхнээс хүсье" гэжээ.
