“Ахмад настны эрхийн тухай НҮБ-ын конвенцыг боловсруулах, батлах үйл явц: Ази Номхон далайн бүсийн орнуудын хамтын ажиллагааг төлөвлөх нь” хэлэлцүүлэг болж байна
✅Хүний эрхийн Үндэсний Комиссоос зохион байгуулж буй “Идэвхтэй насжилт: Ахмадад ээлтэй нийгмийг бүтээх нь” Ази, Номхон далайн бүсийн форум хоёр дахь өдрөө үргэлжилж байна. Өнөөдөр “Ахмад настны эрх, насжилтын асуудлаарх олон улсын чиг хандлага” сургалт болон “Ахмад настны эрхийн тухай НҮБ-ын конвенцыг боловсруулах, батлах үйл явц: Ази Номхон далайн бүсийн орнуудын хамтын ажиллагааг төлөвлөх нь” хэлэлцүүлэг болж байна.
✅ХЭҮК-ын дарга Д.Сүнжид хэлэлцүүлгийг нээж,
“Бид өчигдөр“Идэвхтэй насжилт: Ахмадад ээлтэй нийгмийг бүтээх нь” ахмад настны эрх, насжилтын асуудлаарх Ази, Номхон далайн бүсийн форумыг амжилттай зохион байгуулж, “Улаанбаатарын уриалга”-ыг баталлаа.
✅“Улаанбаатарын уриалга”-ыг бүсийн улс орнууд ажил хэрэг болгохын тулд бүс нутгийн хэмжээнд ахмад настны эрхийн тухай олон улсын эрх зүйн хүчин чадалтай, иж бүрэн баримт бичгийг боловсруулахад чиглэсэн хамтын ажиллагаанд иргэний нийгэм, хүний эрхийн үндэсний байгууллагууд, Засгийн газрууд болон ахмад настнуудын өөрсдийнх нь тулгамдсан асуудлыг тодорхойлох замаар хамтарсан стратегийг бодитой боловсруулах шаардлагатай байна.
✅Энэхүү зорилгоор бид өнөөдрийн хэлэлцүүлгийг зохион байгуулж байна. Тиймээс бүс нутгийн хамтын ажиллагаанд тулгарч буй бэрхшээл, боломж, ахмад настны эрхийн тухай НҮБ-ын конвенц боловсруулах хүртэл Ази, Номхон далайн бүс нутгийн улс орнуудын хамтын ажиллагааны дараагийн арга алхмуудын талаар санал бодлоо чөлөөтэй илэрхийлж, хамтран хэлэлцэж, бүс нутгийн хамтарсан стратеги, бодлогоо боловсруулна гэдэгт итгэлтэй байна” гэлээ.
✅Хэлэлцүүлэгт олон улсын Хүний эрхийн үндэсний байгууллагын төлөөлөгч, Засгийн газар, иргэний нийгэм, ахмадын төлөөлөл оролцож байна. Тэд ийнхүү хэлэлцүүлэг өрнүүлснээр ахмад настны эрхийн тухай олон улсын эрх зүйн хүчин чадалтай, иж бүрэн баримт бичиг боловсруулахад чиглэсэн хамтын ажиллагаанд салбар бүрийнхээ тулгамдсан асуудал, стратегийг тодорхойлох юм.
✅Ингэснээр,
• Бүс нутгийн хамтын ажиллагаанд тулгарч буй бэрхшээл, боломж зэрэг хүчин зүйлсийн зураглал гаргах
• Конвенцын цаг үеийн ач холбогдлыг нэмэгдүүлэх чиглэлээр оролцогч тал бүрд зориулсан стратеги боловсруулах
• Ахмад настны эрхийн асуудлаарх Засгийн газар хоорондын нээлттэй ажлын хэсгийн хэлэлцүүлэгт бүх талуудын тэгш оролцоог хангах арга хэлбэрийг санал болгох
• Ази, Номхон далайн бүс нутагт дараагийн зохион байгуулах арга хэмжээний саналыг дэвшүүлнэ.
✅Хэлэлцүүлгийн үндсэн чиглүүлэгчээр БНСУ-ын Хүний эрхийн Үндэсний Комиссын Олон улсын хүний эрхийн хэлтсийн ажилтан, хатагтай Юукёнг Парк ажиллаж “Ази, Номхон далайн бүсийн орнууд Конвенцын үйл явцад хэрхэн бодитоор хамтран ажиллах вэ” үндсэн сэдэв, -Засгийн газар хоорондын ажлын хэсгийн үйл явцад бүс нутгийн оролцоо ямар сорилтуудтай тулгарч байна вэ
- Ахмад настан болон орхигдсон бүлгүүдийн хүртээмжтэй оролцоог хэрхэн хангах вэ
- Ямар төрлийн дэмжлэг, зохицуулалт, мэдлэгийн солилцоо шаардлагатай вэ дэд сэдвүүдийн хүрээнд хэлэлцүүлэг өрнүүлж байна.
#Хүн_бүр_адил_тэгш_эрхтэй. #Нас_ахисанч_энэхүү_эрх_бүдгэрэх_ёсгүй”
