Хүний эрхийн Үндэсний Комиссын зохион байгуулж буй "Идэвхтэй насжилт: Ахмадад ээлтэй нийгмийг бүтээх нь” Ази, Номхон далайн бүсийн форумын нээлт өнөөдөр (2025.06.19) боллоо.
УИХ-ын дарга Д.Амарбаясгалан форумыг нээж хэлсэн үгэндээ, дэлхий дахинд төрөлт буурч, ажиллах хүчний хомсдол, ахмад настны амьдралын чанар, эрхийн асуудал хөндөгдөж байгаа энэ цаг үед улс орнуудын хамтын ажиллагаа, манлайлал чухал болохыг онцлов. Мөн Монгол Улс бүс нутгийн болон олон улсын түвшинд ахмадын эрхийг хангах, идэвхтэй насжилтыг дэмжих чиглэлд манлайлан ажиллах болно гэдгээ илэрхийлж форумын үйл ажиллагаанд амжилт хүслээ. Мөн НҮБ-ын Ахмад настан хүний эрхээ эдлэх тухай асуудал хариуцсан Тусгай илтгэгч, хатагтай, Клаудиа Малер видео мэндчилгээ дэвшүүлсэн юм.
ХЭҮК-ын дарга Д.Сүнжид, “Ахмад настнууд нийгмийн амьдралд идэвхтэй оролцох, хувь нэмрээ оруулах хүсэл эрмэлзэл, чадвартай гэдэгтээ итгэлтэй байх, эрүүл мэнд, нийгмийн хамгаалал, асаргаа, сувилгаа зэрэг нийтлэг үйлчилгээний хүртээмжийг сайжруулах нь зүй ёсны шаардлага боллоо.
Монголчууд нялхсаа тэтгэж, өтгөсийг асран хүндэлдэг ёс заншил, уламжлалтай ард түмэн. Өөрчлөгдөн буй нийгэм, технологи, өрх гэр, хүн ам зүйн нөхцөл байдалд ахмад настныг нийгмийн идэвхтэй иргэн гэж үзэх, тэдний оролцоог хүлээн зөвшөөрч дэмжих, эрхийг баталгаажуулахад олон талт хүчин зүйлийг тооцоолох учиртай. Энэхүү форум нь бүс нутгийн хамтын ажиллагааг эрчимжүүлэх, харилцан туршлага солилцох, ахмадуудын эрхийн төлөөх нэгдмэл үзэл санааг бий болгох индэр болно гэдэгт итгэлтэй байна” гэв.
Форумд БНСУ-ын Хүний эрхийн Үндэсний Комиссын дарга, Хүний эрхийн үндэсний байгууллагуудын Дэлхийн холбооны Насжилтын асуудлаарх ажлын хэсгийн ахлагч ноён Ан Чанг Хо, НҮБ-ын Хүний эрхийн Дээд Комиссарын газрын Ахмад настны эрх хариуцсан хэлтсийн дарга, хатагтай Читралеха Мари Массей нар хүрэлцэн ирж оролцож байна.
Мөн Филиппин, Балба, Йордан, Тайланд, Энэтхэг, Польш, Катар улсын Хүний эрхийн байгууллагуудын төлөөллөөс гадна Монгол Улсад суугаа Онц бөгөөд бүрэн эрхт Элчин сайдууд, олон улсын байгууллага УИХ, Засгийн газрын гишүүд, эрдэмтэн судлаачид, иргэний нийгмийн байгууллага, иргэдийн төлөөлөл оролцож байгаа юм.
Тэд ахмад настнуудад тулгарч буй асуудлыг хэлэлцэж туршлага хуваалцан, тэдний эрхийн хэрэгжилтийг хангах эрх зүйн орчныг сайжруулах үндсэн зорилгын хүрээнд санал солилцож хэлэлцүүлэг өрнүүлнэ.
