УИХ-ын чуулганы нэгдсэн хуралдаанаар Хууль тогтоомжийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хууль, тогтоолын төслүүдийг хэлэлцэж байна. Байнгын хорооны саналаар зарчмын зөрүүтэй 30 саналд санал хураах үеэр гишүүдийн хооронд маргаан дэгдээзд амжив.
УИХ-ын дэд дарга Б.Пүрэвдорж:
-Тэтгэврийн зээлийн асуудлаар над руу олон хүн мессеж бичиж байна. Үүний дагуу би Хархорин хотын бүтээн байгуулалтын нээлтийн үеэр Хаан банкны захирал болон Монголбанкны ерөнхийлөгч Б.Лхагвасүрэн нартай уулзаж, асуудлыг тодруулсан. Тэд хуучин журмаараа олгож байгаа гэдэг хариулт өгсөн. Гэвч ахмадууд банкин дээр очихоор орлого зарлагын харьцаа 50:50 хэвээрээ, хугацаа богино, шинээр зээл авахад шимтгэл авах нь хэвээрээ нөхцөл байдалтай байна. Тиймээс ирэх даваа гарагт Хаан банкны болон Монголбанкны ерөнхийлөгч, Төрийн банкны захирлуудтай энэ асуудлыг хэрхэн шийдвэрлэсэн гэдгээ хэвлэлийн хурал хийж мэдээлмээр байна. УИХ-ын дарга Д.Амарбаясгалантай сайн ярилцаж, энэ талаар чиглэл өгнө гэсэн.
Ахмадын тэтгэврийн зээл тэглэсэн. Тухайн үед нийт 700 тэрбум төгрөгийн зээл байсан юм байна. Гэвч өнөөдрийг хүртэл тэр зээл Монголбанк дээр өр хэвээрээ, "Эрдэнэс силвер" компаниас нэг ч сохор зоос төлөөгүй. Гэтэл үүнээс хойш маш олон хүн өндөр зээлтэй байж байгаад тэглүүлсэн гээд маш их өндөр зээл авч эхэлсэн. Одоо 2.1 их наяд төгрөгийн зээл болчихсон байна. Бараг гурав дахин нэмэгдэж, асар өндөр хүү төлж байна. Тэтгэврийн зээл тэглэх итгэл найдвараар өндөр зээл авч, тэр мөнгөө хамаагүй зарцуулдаг. Би сайд нараас асуухаар "Огт тийм зээл тэглэхгүй" гэсэн. Энэ нөхцөл байдлаа хэлэх хэрэгтэй. Саяын заалтыг дэмжиж байна. Санал хураалт явуулж, УИХ-ын гишүүдийн 54 буюу 61.4 хувиар дэмжлээ.
УИХ-ын дарга Д.Амарбаясгалан:
-УИХ-ын гишүүд Дэгийн тухай хуулиараа ажлаа явуулмаар байна. Ямар эрх олгогдсон тэр журмаараа ажиллана. УИХ-ын олонх, цөөнх байр сууриа илэрхийлэхэд нь нээлттэй чөлөөтэй хандах байдлаар шаардагдах минутыг нэмэхээс эхлээд уян хатан ажиллаж буй. Гэхдээ энэ боломжийг хавтгайруулах хэлбэр рүү орлоо. УИХ гэдэг байгууллага эмх цэгцтэй, зарчимтай, нээлттэй ил тод байвал олон нийт сэтгэл хангалуун байх нөхцөл бүрдэнэ. Дөнгөж хоёр хоногийн өмнө урд эгнээгээр дүүрэн сууж байсан нөхөд чуулгандаа суухгүй болоод эхэлж байна. Энэ бол Засгийн газрын гишүүнээр томилогдсоны маргаашийнх нь хурал.
Тийм учраас ЗГХЭГ-ын дарга, Тэргүүн шадар сайд, Шадар сайд гэх мэт албан тушаалтнууд чуулганы нэгдсэн хуралдаанд оролцож байх учиртай. Ядаж ирцээ өгөөд ажил гарсан бол учир байдлаа тайлбарлаад явдаг байх хэрэгтэй гэдгийг хариуцлагатайгаар хэлье. Олон нийт УИХ-ыг хариуцлагатай, идэвхтэй ажиллахыг байнга шаарддаг. Энэ шаардлагыг хангуулж ажиллах нь миний үүрэг. Тиймээс шинээр томилогдсон сайд нарыг УИХ-ын чуулганы хуралдаанд хүндэтгэлтэйгээр оролцож байхыг үүрэг болгон хэлж байна.
УИХ-ын гишүүн П.Сайнзориг:
-УИХ-ын дэд дарга Б.Пүрэвдоржийг хариуцлагатай байхыг шаардаж байна. ИТХ татвар тогтоодоггүй, нийслэл тогтоодоггүй юм. Малын хөлийн татварыг та батлалцсан. 336 сумын эрх ашиг унах гэж байгааг хэлсэн юм. Газрын төлбөрийг орон нутаг өөрөө тогтоодог юм. Та бол парламентад алиалагч хийдэг хүн. Намын дарга болохын тулд битгий хоёрын хооронд юм хийж бай. Та намын даргынхаа сунгаанд орчихоод битгий ийм хогийн юм хийж бай. Зүгээр байгаарай.
Б.Пүрэвдорж: Иргэдийн хурлаар гарч байгаа шийдвэрт нөлөөлөл үзүүлэхгүй. Нутгийн өөрөө удирдах ёсны бүрэн эрхийн асуудал. Татвар хураамж ногдуулах асуудлыг хотын даргын эрх мэдэлд өгч болохгүй л гэж хэлж байгаа юм. Сайнзориг гишүүн хотын дарга Нямбаатарт үнгэнчээ харуулах гэж чичрээд байх юм. О.Номинчимэг гээд хуульч гишүүнийхээ үгийг сонс. О.Номинчимэг зарим юмандаа сайн шүү.
УИХ-ын дарга Д.Амарбаясгалан:
-Тавдугаар санал 40.8 хувиа дэмжигдсэнгүй. Нэг зүйлийг анхааруулъя. Ажлын хэсэг яах гэж ажилладаг юм бэ гэдэг дээр төвлөрч хандахгүй бол. Энэ танхимд хоёр гурван хүний зөрчлөөс болоод нэгнийгээ хорлох гэж байгаа хэлбэрээр мэргэжлийн Байнгын хорооны дэмжээгүй саналыг босгож байна гэдэг бол цаашдаа энэ хууль батлагдаад хэрэгжихгүй байх үндсийг тавьж байна. Үүнийг гишүүд анхаараарай. Яах гэж мэргэжлийн Байнгын хороо байгуулж, мэргэжлийн хүмүүс ажилладаг юм бэ гэдгийг бодох хэрэгтэй. Тэгэхгүй Байнгын хороо дэмжээгүй саналыг нь гаргасан хүний лобби, саналаар заавал унагаах гээд танхим дотор ажилладгаа болих хэрэгтэй. Одоо жаахан ёс зүйтэй байцгаа. Та бүхний ард Монголын ард түмний эрх ашиг байгааг бодож бай. Өнөөдөр энэ Хууль тогтоомжийн тухай хуулийн үндсэн зорилго нь Монголд хүний эрхийг зөрчиж, хүнд суртал үүсгэж, авлига бий болгож байгаа олон журмыг цэгцлэхэд оршиж байгаа. Гэтэл энийг дунд нь сааруулж, нэг яамны 20, 30 тогтсон хэв маягийг өөрчилж, эвдүүлэхгүй гэдэг хэв маягаар ажиллаж болохгүй ээ. УИХ өөрчлөлт шинэчлэл хийхийн тулд энд сууж байгаа. Хүний эрхийг дээдэлсэн хууль эрх зүйн орчныг бий болгохоор ажиллаж байна. Малын хөлийн татварын журам чинь сумандаа бас л авлигын асуудал болсон. Сум орон нутгийн хэмжээнд энэ дээр ямар хэлбэрээр шийдэх нь тус тусдаа асуудал болсон.
УИХ-ын гишүүн М.Бадамсүрэн:
-Дэгийн хуульд өөрчлөлт оруулах саналтай байна. Олон давтагдаж байна. Байнгын хороон дээр дэмжээгүй саналыг дэмжинэ гэдгээ болих хэрэгтэй. Дэмжээгүй болон дэмжсэн саналыг хоёуланг нь чуулганаар дэмжсэн эсэхээр хураахгүй бол ирцээ бүртгүүлээд гарч явсан гишүүд эс үйлдэхүйгээрээ дэмжигдээд байна. Энэ бол гол хямрал. Төслийг эцсийн хэлэлцүүлэгт бэлтгүүлэхээр Хууль зүйн байнгын хороонд шилжүүллээ.
