XVII жарны “Элдэв эрдэнэт” хэмээх модон могой жилийн Сар шинийн баярыг тохиолдуулан УДЭТ-ын жүжигчин Ж.Оюундарийг театрын урлагт оруулсан хувь нэмэр, хичээл зүтгэл, бүтээсэн дүрүүдийг нь үнэлэн Монгол Улсын Ардын жүжигчин цолоор, УДЭТ-ын жүжигчин М.Түвшинхүү, О.Гэрэлсүх нарыг театрын урлагт оруулсан хувь нэмэр, хичээл зүтгэл, бүтээсэн дүрүүдийг нь үнэлэн Монгол Улсын Гавьяат жүжигчин цолоор тус тус шагнагдахаар болсон байна.
Монгол Улсын Гавьяат жүжигчин Жамсранжавын Оюундарь 1968 оны зургадугаар сарын 04-нд Улаанбаатар хотноо төржээ. Тэрбээр Монгол Улсын Ардын жүжигчин Лоолийн Жамсранжавын охин билээ. Ийнхүү Ардын жүжигчний охин Ардын жүжигчин цол хүртэж байгаа нь Сар шинийн босгон дээр тайз, дэлгэцийн урлагт хайртай монгол түмний магнайг тэнийлгэсэн сайхан мэдээ болж байна. Ж.Оюундарь жүжигчин 1976-1986 онд Нийслэлийн 52-р сургуулийг дүүргэжээ. 1988-1992 онд СУИС-д Л.Лхасүрэнгийн удирдлагад жүжигчний мэргэжлээр суралцаж төгссөн байна. Мөн 2005-2007 онд Д.Жигжидийн нэрэмжит КУДС-д магистрын зэрэг хамгаалсан аж.
ран бүтээлий гараагаа 1991-1993 онд Армийн Драмын театрт жүжигчнээр эхэлж, 1993 оноос одоог хүртэл УДЭТ-ын жүжигчнээр ажиллаж байгаа юм. Мөн 2010 оноос “Сити” дээд сургуульд багшилж байгаа аж. Тэрбээр үндэсний болон дэлхийн сонгодог 80 гаруй жүжигт гол болон туслах дүр бүтээжээ.
- 2001 онд ОХУ-д болсон театрын “Ламбушка” наадамд “Би эрчүүдийг хүснэ” жүжгээр ТЭРГҮҮН байрын шагнал
- 2005 онд “Саран хөхөө” жүжгийн Сурасадины дүрээр “Гэгээн Муза II” наадмын ШИЛДЭГ ЭМЭГТЭЙ ГОЛ ДҮР –ийн шагнал
- 2013 онд “Эсрэг дурлал” жүжгийн Шивэгчний дүрээр “Гэгээн Муза X” наадмын ШИЛДЭГ ЭМЭГТЭЙ ТУСЛАХ ДҮР-ийн шагнал
- 2016 онд “Ромео Жульетта хоёр” жүжгийн Өрлөг эхийн дүрээр “Гэгээн Муза XIII” наадмын ШИЛДЭГ ЭМЭГТЭЙ ТУСЛАХ ДҮР-ийн шагнал
- 2018 онд “Би эндээс явахгүй” жүжгийн Должингийн дүрээр “Гэгээн Муза XVI” наадмын ШИЛДЭГ ЭМЭГТЭЙ ТУСЛАХ ДҮР-ийн шагнал тус тус хүртэж байв. 2011 онд Монгол Улсын Гавьяат жүжигчин цол хүртжээ.
