Улстөрийн намууд дотроо бужигнаж, тогоондоо толхилцож байна. Ардчилсан нам сууриа олохгүй ганхаж, суудлаа олохгүй төөрч л явна. Харин ах нэрт Ардын намынхан хайрцгандаа хагаралтай, толхилцооноо тод харуулахгүй байгаа бололтой. МАН-ын түшээд болсон хүмүүсээс авлига, нүүрсний хэрэгт холбогдсон нь ил болов. Ар араасаа цувран шалгагдах хүмүүсийн тоо ч нэмэгдсээр. Энэ бүхнийг ил тодоор зарлахгүй бас л нууцлах.
Тэгвэл сүүлийн үед намынхаа генсекийг солих холих тухай жиргээ МАН-ын хаш цагаан ордны зүгээс задрав. Шинэ он гарахаас өмнө "АХ" нам бага хурлаа хийж ерөнхий нарийн бичгийн даргаа огцруулж, будаг үнэртсэн цоо шинэхэн даргатай болох сурагтай. Давхар дээлтэй, хоёр албан тушаал хашдаг Д.Амарбаясгаланг дан суудалтай болгох юм. Тодруулбал, МАН-ын дүрэмд генсек давхар дээлтэй байж болохгүй гэсэн заалттай ч өндөр дээд сэнттийд заларсан эрхэм нэгэнд энэ дүрэм, журам үйлчлэлгүй чамгүй хугацаа өнгөрсөн аж.
Тэгвэл Бага хурлаа зарлан хуралдуулж энэхүү дүрмээ хэрэгжүүлэх бололтой. Гэхдээ генсекийн толгойлох УЗ Бага хурлын товыг тогтоосон цагт уг халаа сэлгээний асуудал яригдана. Д.Амарбаясгалан хүйтний цагт давхар дээлнээсээ салахыг хүсэхгүй л байгаа байх. Ерөнхийдөө хүсэл зориг, өөрийн дуртайдаа хуралдуулах гэж байгаа асуудал ч биш бөгөөд дээрээс шидсэн чулуу хүчтэй бууснаас үүдэлтэй гэнэ. Д.Амарбаясгалангийн намын төв байрны тухлаг өрөөнд хэн гэдэг хүний хүү залрах бол гэсэн яриа энэ зуур өрнөв. Мэдээж хэрэг, нэгдүгээр хүний томилгоо явах нь гарцаагүй. Түүний санал болгох нь хүмүүсийн нэгдүгээр Я.Содбаатар байх нь гарцаагүй биз. Удаад нь, Ж.Энхбаярын нэр цохиж явна. Эндээс харахад Я.Содбаатар яг таг таарах нэгэн болж байгаа хэрэг. Түүний хувьд ерөнхий нарийн бичгийн даргаар ажиллаж, намаа удирдалцаж явсан үүх түүх баялагтай хүн. Иймд МАН-ын Ерөнхий нарийн бичгийн даргаар Я.Содбаатарыг сонгосноор намын Бага хурал өндөрлөх биз ээ.
