Индонезид “Их-20” бүлгийн удирдагч нарын чуулга уулзалт үргэлжилж буй. Энэ үеэр БНХАУ-ын удирдагч Ши Жинпинь Канадын Ерөнхий сайд Жастин Трюдо нарын таагүй байдалтай харилцан яриа камерт үлдсэнийг гадаадын хэвлэлүүдүүд онцолжээ. Тодруулбал, Ши Жинпинь Канадын Ерөнхий сайд Жастин Трюдог өмнөх уулзалтаар ярьсан асуудлуудаа хэвлэлд задруулсан гэж буруутгасан байна. Бидний ярьсан бүхэн хэвлэлд задарсан нь тун зохимжгүй үйлдэл гэж ши Жинпинь дарга Трюдод хандан хэлсэн ба хариуд нь Трюдо толгой дохин зогсч байгаа нь бичлэгт үлджээ. Хэрэв харилцаандаа чин сэтгэлээсээ хандвал хоёр талын хэлэлцээ харилцан хүндэтгэлтэй өрнөнө, эс бол ямар үр дүн гарахыг таамаглах боломжгүй гэж Ши Жинпинь дарга Трюдод хандсан хатуу үгээ үргэлжлүүлсэн байна.
Трюдо хариуд нь "Канадын зүгээс чөлөөтэй, илэн далангүй яриа хэлэлцээ хийнэ гэдэгтээ итгэж байна. Харилцаа, хамтын ажиллагаагаа цаашид бүтээлчээр үргэлжлүүлэн ажллах болно. Гэхдээ бидний санал нийлэхгүй зүйл ч гарч болох юм" гэж хариулсны дараа БНХАУ-ын дарга түүнтэй гар барьж таагүй харилцан яриа дуусчээ.
БНХАУ-ын дарга дээд хэмжээний уулзалтын үеэр даваа гарагт АНУ-ын ерөнхийлөгч Жо Байдентай уулзаж, Австрали, Франц, Нидерланд, Өмнөд Африк, Испани, Сенегал, Аргентин, Индонези, Өмнөд Солонгосын удирдагчидтай ч албан ёсны хэлэлцээ хийсэн юм. Харин Канад ийм албан ёсны хэлэлцээ хийх боломж олгоогүй бөгөөд энэ нь 2018 онд "Huawei"-ийн ахлах захирал Мэн Ванжоуг Канадад саатуулж, үүнээс ес хоногийн дараа Канадын хоёр иргэнийг Хятадад саатуулсантай холбоотой байж магадгүй гэж CNN дүгнэжээ. Канад, Хятадын талууд саатуулсан дээрх иргэдээ 2021 онд сулласан байна.
