Нэрт хөгжмийн зохиолч, найрал дууны удирдаач Гончигдамбын Дарамзагдын нэрэмжит Олон улсын мэргэжлийн дуулаачдын 4-р уралдаан үргэлжилж байна. Уралдааны хоёрдугаар шатанд шилдэг 25 оролцогч шалгаран үлдээд байгаа юм байна. Энэ жил нэрт хөгжмийн зохиолчийн мэндэлсний 90 жилийн ой тохиож буй бөгөөд түүний нэрэмжит мэргэжлийн дуулаачдын уралдааныг олон улсын хэмжээнд цахимаар зохион байгуулж буй юм. Уралдааныг Дорнод аймгийн Засаг даргын Тамгын газар, тус аймгийн Боловсрол, соёл, урлагийн газар, Дорнод аймгийн Хөгжимт драмын театр, Монгол Улсын Консерватори болон Дорнод аймгийн Цагаан-Овоо сумын Засаг даргын Тамгын газар, хөгжмийн зохиолчийн үр хүүхдүүд хамтран зохион байгуулж байгаа ажээ.
Монголын нэрт хөгжмийн зохиолч, найрал дууны удирдаач Г.Дарамзагд Дорнод аймгийн Цагаан-Овоо суманд төрсөн бөгөөд 1961-1966 онд Москвагийн хөгжмийн дээд сургуулийг найрал дууны удирдаач мэргэжлээр төгссөн байна. 1947 оноос Монгол ардын армийн Дуу бүжгийн чуулгад дуучин, 1951-1961 онд мөн тэндээ найрал дууны удирдаачаар ажиллаж байв. 1966-1969 онд УАДБЧ-д, 1969-1970 онд Дорнод аймгийн Хөгжимт жүжгийн театрт, 1970-1979 онд УДБТ-т найрал дууны ерөнхий удирдаачаар болон Эрдэнэт хотын Соёлын ордонд ажиллаж байжээ. “Нүүдлийн замд” дууриа 1980 онд бичжээ. Уг дуурийг Л.Түдэвийн зохиол, П.Бадарчийн цомнолоор бичсэн аж. Найрал хөгжмийн сүүлийн хэсгийг бичиж амжаагүй нас барсныг түүний шавь МУГЖ, алдарт дуучин, хөгжмийн зохиолч Д.Дашням гүйцээн дуусгасан байна. Энэ дуурийг 1985 онд ДБЭТ-т тавьсан юм. Нэрт хөгжмийн зохиолч Г.Дарамзагд “Ленин” оратори 1972он (Ж.Бадраагийн үг), “Хүн” магтуу найраглал 1975-1976 (Ж.Межелайтисын найраглал), “Нэг цэргийн тухай дууль” 1971 (Ч.Чимидийн шүлэг) болон 500 орчим найрал дуу, чуулга, дуу, романс, бүжгийн хөгжим, 200 орчим дууны найруулга хийжээ. “Баавгай дуулах уу” хөгжимт жүжиг 1974 (А.Очирбат), “Гургалдай” хөгжимт жүжиг 1975 (А.Чойсон), киноны хөгжим “Ардын цэрэг” /1977/. “Өргөн Сэлэнгэ” дууны түүвэр /УБ., 1972/, “Орчлонд бид азтай төржээ” дууны түүвэр /УБ.,1983/, “Монголын сайхан орон” дууны түүвэр /УБ.,2011/ онд хэвлэгдсэн байна.
