УИХ-ын гишүүд Гүржид зугаалж явна. Ингэж хэлэхээр гүтгэсэн болох байх. Уг нь хөөрхий хууль судалж яваа юм. Гэхдээ л тэд үнэхээр улсын мөнгө уйлдаггүй гэдгийг харуулж чадаж байна. Нэг хууль санаачилчихаад, туршлага судална гээд гадаад явж галуу, тахианы мах иднэ гэдэг бол УИХ-ын гишүүдэд л олдох алтан завшаан, аятайхан боломж юм. УИХ-ын даргын захирамжаар Зөвшөөрлийн тухай хуулийн төсөл боловсруулах ажлын хэсэг байгуулагдаж, уг ажлын хэсгийг УИХ-ын гишүүн Х.Ганхуяг ахалжээ. Ажлын хэсэгт нь УИХ-ын гишүүн Г.Амартүвшин лав багтсан бололтой юм. Тэд Гүржид туршлага судалж яваа аж. Уг нь цар тахлын энэ хүнд үед УИХ-ын гишүүд хууль судлах нэрээр гадаадад томилолтоор явах шаардлага огт байхгүй. Тэдний томилолтын зардлаар хэчнээн хүний амь насыг аврах эм тариа, амьсгалын аппарат худалдан авч болох вэ гээд бодоод үзвэл бас багагүй тоо гарна.
Дэлхий хавтгай болсон энэ цаг үед бусад улс орны туршлагыг судлах гэж давхиж очдог хөг аль эрт өнгөрснийг шинэ залуу бөгөөд бизнест гялалзсан амжилттай явсан хоёр гишүүн уг нь мэдмээр юм. Гүржээс Зөвшөөрлийн тухай хуулийнх нь зохицуулалтыг судалъя гэвэл парламентынх нь судалгаа, шинжилгээний байгууллагатай холбогдоод л хуулийн төслүүд хийгээд бодлого, зохицуулалтынх нь онцлогийн талаарх мэдээллийг нээлттэй авчихаж болох шүү дээ. Ганц хуулийн төсөл, түүнтэй холбоотой зохицуулалт, эрх зүйн баримт бичиг судлаж танилцах байтугай гадаадын их сургуулиудын бүхэн бүтэн магистр, докторын сургалтад зайнаас хамрагдаж, диссертацийг нь бие даан хийгээд, цахимаар хамгаалчихдаг л болсон цаг үе шүү дээ.
Цар тахлын хүнд үед төсвийн мөнгийг хэмнэх нь юу юунаас чухал. Засгийн газраас энэ талаар тодорхой захирамж, тогтоол гарган, гадаад томилолт болон төсвийн мөнгөөр зохион байгуулах элдэв арга хэмжээний зардлыг танасан. Харин УИХ энэ тал дээр хойрго байгаагийн нэг жишээ нь хууль судлах нэртэй зугаалга ажээ. Ташрамд дурдахад УИХ-ын гишүүд хууль санаачлах, гадаад дотоодод томилолтоор явах зэрэгт жилд 250 сая төгрөг зарцуулах эрхтэй байдаг. Өнөөгийн УИХ бүрдсэний дараахан буюу өнгөрсөн оны 10-р сард УИХ-ын гишүүн А.Адьяасүрэн томилолтын зардал гэж 100 сая төгрөгийг зөвлөхийнхөө дансаар дамжуулан, нэг өдрийн дотор гурав хуваан шилжүүлэн авсан нь дуулиан тарьж байсан юм. Эндээс харахад УИХ-ын гишүүд гадаад, дотоод томилолтын зардлыг өөр зүйлд ашигладаг, эсвэл боломжийг тултал ашиглан хууль судлах, туршлага судлах нэрээр гадаадад аялж зугаалдаг байх нь. Оны эцсээр гишүүдийн гадаад томилолтоор явах идэвх гэнэт сэргэдэг нь 250 сая төгрөгөө онд нь багтаан үрж дуусгах гэдэгтэй нь холбоотой ажээ.
