Монгол Улсын Их Хурлын чуулганы хуралдааны дэгийн тухай хуульд нэмэлт оруулах тухай хууль, энэ хуулийг дагаж мөрдөх Монгол Улсын Үндсэн хуульд нэмэлт, өөрчлөлт оруулах журмын тухай хуульд нэмэлт оруулах тухай хуулийн төслийг гишүүн Н.Энхболд, Д.Тогтохсүрэн, Ж.Мөнхбат, Л.Мөнхбаатар, Ш.Раднаасэд нар өнөөдөр өглөө УИХ-д өргөн мэдүүлээд үдээс хойш батлуулав. Ганц өдөрт хууль "машинддаг" энэ ажиллагаа Монголын парламентад удаа дараа давтагдаж байгаа ч энэ удаагийнх илүү ноцтой. Үндсэн хуулийг элдэв халдлагаас хамгаалахын тулд баталсан Үндсэн хуульд нэмэлт, өөрчлөлт оруулах журмын тухай хуулийг хэдхэн цагийн дотор өөрчлөв. Энэ өөрчлөлтийг Цэцийн дүгнэлттэй холбогдуулан хийсэн гэх бэлэн тайлбартай.
Үндсэн хуулийн цэц Засгийн газарт 4 хүртэл УИХ-ын гишүүн ажиллаж болно гэсэн Үндсэн хуулийн заалтыг Их суудлын хуралдаанаараа хүчингүй болгосон тул улс төр бужигнаж эхэлсэн. УИХ-ын гишүүд бараг бүгдээрээ шахуу сайд болж дээлээдавхарлах боломж гарсныг ашиглачих санаатай нойргүй хоноцгоож байна. Ганцхан өдрийн дотор 2 хууль өөрчилсөн нь Үндсэн хуулийг дахин өөрчлөх цонхыг нээж өгсөн хэрэг байлаа. Үндсэн хуульд 2019 онд нэмэлт, өөрчлөлт оруулсан учир түүнээс хойш 8 жилийн дотор дахин гар хүрэх Үндсэн хуульд нэмэлт, өөрчлөлт оруулах журмын тухай хуулиар хориотой байв. Энэ хоригийг УИХ гэрлийн хурдаар цуцаллаа.
УИХ-ын гишүүд Цэцийн дүгнэлт хийгээд хоёр хуульд өөрчлөлт оруулсан талаар янз бүрийн байр суурь илэрхийлэв. Гишүүн С.Ганбаатар МАН өөрийгөө булшиллаа. Үндсэн хуульд гар хүрснээрээ ард түмний итгэлийг бүрэн алдана гэсэн. Гишүүн Н.Алтанхуяг эдийн засаг хүнд, хүмүүсийн амьдрал сайнгүй байхад Үндсэн хуулийг өөрчлөх нь цагаа олоогүй алхам гэж мэдэгдэв. Гишүүн Б.Бат-Эрдэнэ гуравхан жилийн өмнө Үндсэн хуулиа өөрчилснөө мартаж орхиод давхар дээл нөмөрчих гээд зүтгэцгээгээд байх юм гэж халаглав. Гишүүн С.Одонтуяа Үндсэн хуулийн цэц улс төрийн захиалга гүйцэтгэгч болжээ. Монголын төрийг Цэцийн 9 гишүүн дураараа бужигнуулж байна гэсэн юм.