Улсын баатар Э.Бат-Үүлийг Ардын уран зохиолч Сэнгийн Эрдэнийн хүү гэдгийг олон нийт сайн мэднэ. Харин аавыгаа дууриаж өгүүллэг бичиж байсныг нь тэр бүр мэдэхгүй болов уу. Ирээдүйн улстөрч, улсын баатар Э.Бат-Үүл дунд сургуульд байхдаа богино өгүүллэг анх бичжээ. Уг өгүүллэгээ хожмын нэрт сэтгүүлч Ц.Балдорж найздаа үзүүлсэн байна. Энэ тухайгаа Э.Бат-Үүл дарга “Тэр өгүүллэг мэдээж олигтой юм болоогүй” хэмээн нэгэнтээ өгүүлсэн байдаг. Харин ийнхүү өгүүллэг бичиж байсан туршлага нь түүнийг улстөрч болсон хойноо нийтлэл бичихэд нь их хэрэг болсон гэдэг.
Э.Бат-Үүл баатар багадаа нэлээд хөдөлгөөнтэй хүүхэд байсан бөгөөд уран зохиолын хичээл дээр асуугдах болоход аавынхаа өгүүллэгүүдийг ярихдаа ихээхэн ичдэг байжээ. Багш нар нь түүнийг хараад “Том зохиолчийн хүүхэд ийм байх гэж” хэмээн толгой сэгсрэх удаа ч цөөнгүй байсан ажээ. Юутай ч Монголын уран зохиолын ноён оргил болсон Сэнгийн Эрдэнэ баавайн хүү аав шигээ ардын уран зохиолч болоогүй ч улсын баатар хэмээх эрхэм цолыг энх цагт хүртсэн билээ.
