Үндэсний бөхийн цол чимэг олгодог 31 дэх удаагийн “Бүх цэргийн наадам” амжилттай сайхан болж өндөрлөлөө.
Тус барилдаанд цэрэг, хүчний байгууллагад харьяалагддаг Аймаг, цэргийн цолтой болон залуу 256 бөх уран мэх, авхаалж самбаа сорин барилдсанаас Завхан аймгийн Яруу сумын харьяат, “Хилчин” СХ, Жем интэрнэшнл групп, “Даян” дэвжээний бөх,цэргийн арслан Мөнхтөрийн Лхагвагэрэл 8 даван түрүүлж, хурц чимэг нэмж, энэ цагийн аймаг, цэргийн цолтнуудынхаа манлайд эрэмбэлэгдэхээр болсон бол Архангай аймгийн Тариат сумын харьяат, “Алдар” СХ, “Талын Хишиг Майнинг” ХХК, “Бөхбилэгт” дэвжээний бөх, сумын заан Өнөрбаянгийн Батсуурь үзүүрлэж, цэргийн заан цол хүртлээ.
Их шөвөгт шалгарсан Увс аймгийн Тэс сумын харьяат, Хилчин СХ, Хово центр ХХК, Увснуур дэвжээний бөх, аймгийн заан О.Түмэн цогт чимэг нэмсэн бол Булган аймгийн Сайхан сумын харьяат, “Хилчин” СХ, -ны бөх, цэргийн начин Б.Бат-Эрдэнэ цэргийн харцага, мөн тав давж шөвгөрсөн Архангай аймгийн Хашаат сумын харьяат, “Алдар” СХ, “Залуу ноёд” ХХК, “Бөхбилэгт” дэвжээний бөх, сумын заан С.Сүхбат, Увс аймгийн Тэс сумын харьяат, “Алдар” СХ, “Улаангом” дэвжээний бөх, сумын заан Г.Баянмөнх нар цэргийн начин цол тус тус хүртлээ.
Харин дунд шөвгийн наймд үлдсэн аймгийн арслан Б.Түмэндэмбэрэл өрнөх чимэг, аймгийн харцага О.Үйтүмэн өлзийт чимэг нэмэв.
Ирэх долоо хоногт буюу зургаадугаар сарын 04-нд Сумын цолтой болон залуу бөхчүүдийн хаалтын барилдаан,
зургаадугаар сарын 05-нд “Дашваанжил газ” ХХК-ны нэрэмжит "Чингэлтэй хайрханы хишиг" Улс, аймгийн алдар цолтой чансаа өндөр 128 бөхийн барилдаан тус тус болно.
