Япон улсын Осака хотноо Олон улсын Азийн киноны их наадам өчигдөр эхэлжээ. Уг наадамд шилдэг 15 кино Гранпри цомын төлөө өрсөлдөх юм. Манай улсаас найруулагч Ж.Сэнгэдоржийн "Худалдагч охин" кино энэхүү наадамд оролцож байгаа бөгөөд гуравдугаар сарын 14, 19-нд "Умеда" кино театр болон "ABC hall"-ын дэлгэцнээ гарахаар болжээ. Мэргэжлийн экспертүүд "Худалдагч охин" киног Монгол киноны имижийг цоо шинээр өөрчилсөн бүтээл хэмээн өндөр үнэлгээ өгсөн байна.
Жил бүр Япон улсын Осака хотноо зохиогддог Олон улсын Азийн кино наадам энэ жил 17 дахь удаагаа хөшгөө нээжээ. Энэ жилийн кино урлагийн ноён оргил болох Оскарын шагналд нэрт зохиолч Мураками Харукигийн зохиолоор бүтээсэн “Машиныг минь жолоод” кино нэр дэвшин, өрсөлдөж байгаа нь Японы кино ертөнцийн түүхэнд цоо шинэ найдвар, хүсэлт, хүлээлт авчирч олныг шуугиулж байгаа юм. Энэ үед монгол кино ийнхүү Азийн кино наадамд нэр дэвшиж байгаа нь анхаарал татаж байна.
Найруулагч Ж.Сэнгэдорж 2010 онд Нарагийн Олон улсын кино наадамд “Хүчилтөрөгч” киногоороо амжилттай оролцож, монгол хүний сэтгэл зүй, өвөрмөц ахуй, хөдөөгийн дүр зургийг япончуудад танилцуулж, зүрх сэтгэлийг нь хөндөж байсан бол энэ удаа огт өөр өнгө төрх, орчин үеийн монгол ахуй, шинэ үеийн залуусын санаа бодол, сэтгэлгээг танилцуулж буйгаараа онцлог аж.
Энэ удаагийн наадамд 954 кино өрсөлдөж, сүүлийн шатанд 15 кино шалгарч үлдсэн байна. 2005 оноос эхэлсэн энэхүү наадмын түүхийг сөхвөл 2012 онд найруулагч Б.Баатарын “Татар ажиллагаа” кино тусгай ангилалд шалгарч, 2016 онд Германд ажиллаж амьдарч, уран бүтээлээ туурвидаг найруулагч Б.Үйзэнмаа “Над руу битгий ингэж хар” киногоороо шилдэг залуу уран бүтээлчийн шагналыг хүртэж байсан бол 2021 онд “Хар сүү” кино нь, мөн залуу найруулагч П.Золжаргалын богино хэмжээний кино “Нүцгэн гэрэл” онцлох киноны ангилалд тус тус шалгарч япон үзэгчдийн хүртээл болж байжээ.
Найруулагч Ж.Сэнгэдорж бүтээлийнхээ талаар "Олон улсад Монголын тал нутаг, нүүдэлчин ахуй соёл, монгол киноны өнгө төрхийг илэрхийлдэг, түүгээрээ олон улсад танигддаг бол энэ удаа огт өөр монгол киноны уламжлалт имиж, дүр төрхийг эвдсэн цоо шинэ эрэлхийллийг үнэлэн сүүлийн шатанд тунаж үлдсэн юм. Энэ наадам надад маш их урам өгч байна. Анх кино театрт нээлтээ хийгээд гарч эхэлсний дараа үзэгчдийн хариу сэтгэгдэл ямар байх бол гэхээс жаахан айж, түгшиж байсан л даа. Монголд байхгүй тэр болгон дэлгээд байдаггүй эмзэг сэдэв учир яаж хүлээж авах бол гэж түгшиж байсан. Гарснаас хойш сэтгэл дотроо зөрчилдөөд л яваад байсан. Наадамд тунаж үлдлээ гэдгийг сонсоод яг зөв зам дээрээ зогсож байгаа юм байна гэдгийг надад хэлж өглөө. Тэр нь их сайхан санагдаж байна. Би үзэгчдэдээ тулгахыг хүсдэггүй. Өөр өөрсдийнхөө мэдрэмжээр хүлээж авах нь л чухал юм даа. Миний дотоод хүний зөв байжээ. Өөрийнхөөрөө байж чадсандаа би их баяртай байна" гэжээ.
Осакагийн Олон улсын Азийн кино наадмын хүрээнд энэ сарын 10-20-ны өдрүүдэд Гранприд өрсөлдөх тэргүүн хэсэг, онцлох кино, бие даасан кино, тусгай урилгын кино зэрэг хэсгүүдэд хуваагдан 31 орны кино Осака хотын театрт дэлгэцнээ гарна. Мөн цахим кино театр, Хонконг, Тайваны кино өдөрлөгүүд зохион байгуулагдах аж. Өнөө үеийн Азийн орнуудын амьдрал, өнгө төрх, үзэл бодол, нийгмийн байдал, далдуур гарч буй үзэгдлийг шалгарсан кинонуудаар дамжуулан үзэгч олон таньж мэдэх нь дамжиггүй. Тус наадмын төгсгөлд хамгийн шилдэг кино Гран при, өсөх ирээдүйтэй залуу уран бүтээлчид олгодог “Шилдэг авьяаслаг уран бүтээлч” шагнал, “Асахи” телевизийн нэрэмжит шагнал, Шилдэг дүр, Үзэгчдийн шагналуудаас гадна байгууллагуудын нэрэмжит тусгай шагналуудын эзэд тодрох юм.
