УИХ-ын дарга Г.Занданшатарын санаачлагаар “УИХ ба сэтгүүл зүй” сэдвийн хүрээнд цуврал сургалтуудыг хэвлэл мэдээллийн байгууллагынханд зориулан зохион байгуулж байна. Өнөөдрийн гуравдахь удаагийн сургалтыг Авлигатай тэмцэх газар, Үндэсний Аудитийн газар, Санхүүгийн зохицуулах хороо, Төрийн албаны зөвлөлтэй хамтран зохион байгуулав.
УИХ-ын дарга Г.Занданшатар “ Үндсэн хууль ба засаглалын харилцан хяналт тэнцэл” сэдвийн хүрээнд сургалт хийсэн юм. Тэрбээр сэтгүүл зүйн салбар мэргэжлийн, ёс зүйтэй, баримт нотолгоонд суурилсан байж улмаар итгэл үнэмшил бүхий мэдээ мэдээллийг олон нийтэд хүргэх нь чухал болж байна.
Хүний эрх, эрх чөлөөг хангахын тулд хууль тогтоох, гүйцэтгэх, шүүх эрх мэдэл зэрэгцэн оршиж байх ёстой. Энэхүү засаглалын үндсэн зарчмыг хангахад хэвлэл мэдээллийнхэн буюу дөрөвдэх засаглалын үүргээ гүйцэтгэж хамтран ажиллахын чухлыг онцолсон юм.
Нэн удахгүй хэрэгжих УИХ-ын хяналт шалгалтын тухай хуулийн талаар танилцуулахыг сэтгүүлчид хүссэн байна. Тиймээс УИХ-ын дарга Г.Занданшатар тус хуулийн талаар дэлгэрэнгүй танилцуулга хийлээ.
УИХ томилгооны болон төсвийн эрх мэдлээ Засгийн газар шилжүүлж, харин хяналт шалгалтын эрх мэдлээ тодотгосон. Хяналт шалгалтын эрх мэдлийн хүрээнд хуулийн биелэлтийг хангахтай холбоотой нийтийн ашиг сонирхлын дагуу УИХ-ын гишүүдийг 4/1 доошгүй санал гаргавал цөөнхийн төлөөллийг оролцуулан Түр хороо байгуулахаар заасан байгаа.
УИХ-ын хяналт шалгалтын тухай хууль 7 бүлэг 58 зүйлтэй. Энэхүү хуулиар хяналт шалгалтын арга хэрэгсэл, түүнийг хэрэгжүүлэх тогтолцоог тодорхой зааж өгсөн бөгөөд төсвийн хяналт, хяналтын сонсгол хийх, хянан шалгах түр хороо байгуулах зэрэг үйл ажиллагааг тусгажээ.
УИХ-аас Хөгжлийн банктай холбоотой Ажлын хэсэг байгуулагдан ажиллаж байгаа. Энэхүү ажлын хэсгийг өөрчлөн хуулийн дагуу Түр хороо байгуулан ажиллахыг дэмжиж буй эсэхийг сэтгүүлч УИХ-аас даргаас асуусан.
“Одоогоор Ажлын хэсэг зээл авсан аж ахуйн нэгжүүдийн зээлийн барьцаанд тавьсан хөрөнгийг газар дээр нь очиж үзэх, төсөл хөтөлбөрийн үр дүнтэй танилцах зэрэг ажлуудыг хийж байна. Хаврын чуулган энэ сарын 15-ны өдөр эхэлнэ. Тиймээс Ажлын хэсэг тайлангаа тавих ёстой. Түүний дараа Түр хороо байгуулах эсэхийг УИХ шийднэ. Миний бие Түр хороо байгуулахыг дэмжиж байгаа” гэв.
“УИХ ба сэтгүүл зүй” ээлжит сургалт тодорхой сэдвийн дагуу болж буй учраас хамтран зохион байгуулагчид хэвлэл мэдээллийн байгууллагынхантай хэрхэн хамтран ажиллах боломж, хуулийн хүрээнд мэдээлэл түгээх гарц болон үйл ажиллагаагаа танилцуулсан мэдээллийг өгсөн юм.
Авлигатай тэмцэхэд хэвлэл мэдээллийн байгууллагатай хамтран ажиллах, түүний ач холбогдол, авлигын гэмт хэргийн мэдээллийг олон нийтэд түгээхэд анхаарах асуудлууд зэрэг сэдвээр Авлигатай тэмцэх газрын албан тушаалтнууд мэдээлэл өглөө.
Мөн УИХ-ын хяналт шалгалтыг хэрэгжүүлэхэд төрийн аудитын байгууллагын үүрэг, хараат бус байдал, олон нийтийн оролцоо, Статистик мэдээг мэдээллийн эх сурвалж болгон ашиглах боломж, шаардлага , СЗХ-ны зохицуулалтын салбарын онцлог, Виртуал хөрөнгийн үйлчилгээ үзүүлэгчийн зохицуулалт, Дата судалгаанд суурилсан төрийн алба зэрэг сэдвээр дээрх байгууллагуудын холбогдох албан тушаалтнууд сэтгүүлчдэд зориулан мэдээлэл бэлтгэжээ.
