Японы мэргэжлийн сүмогийн нэгдүгээр сарын тэмцээн Хацү башё ирэх ням гараг буюу 2022 оны нэгдүгээр сарын 09-нд эхэлнэ. Хацү башёгийн банзүкэгээс үзэхэд энэ сарын башёг цорын ганц их аварга Тэрүнофүжи Г.Ган-Эрдэнэ тэргүүлэн барилдана. Тэрбээр өнгөрсөн оны арваннэгдүгээр сарын башёд өвдөг шороодолгүй түрүүлснийхээ дараа өмнөх дөрвөн монгол их аваргын амжилтыг давтах, түрүүлсэн тоогоо хоёр оронтой тоонд хүргэх зорилготой байгаагаа хэлсэн юм. Өөрөөр хэлбэл тэрбээр 2022 оны зургаан башёгийн дөрөвт нь түрүүлэх зорилт тавьжээ.
Энэ сарын башёд Их аваргын араас Такакэйшо, Шодай нарын озэки цолтнууд, Митакэүми, Таканошо нарын сэкивакэ нар, Мэйсэй, Дайэшо нарын комүсүби нар эрэмбэлэгдсэн байна.
Харин маэгаширагийн баруун жигүүрийг монгол сүмочид болох Кирибаяма Б.Лхагвасүрэн, Ичиножо А.Ичинноров нар тэргүүлжээ. Түүнчлэн Тамаваши Б.Мөнх-Оргил маэгаширагийн зүүн жигүүрийн гуравт, Чиёошомо Г.Мөнхсайхан маэгаширагийн баруун жигүүрийн тавд, Хоошорвү С.Бямбасүрэн маэгаширагийн зүүн жигүүрийн зургаад эрэмбэлэгджээ.
Жюүрёо зиндаанд Азүмарү С.Тодбилэг, Миторюү Б.Төрболд нар хүч үзэж байгаа бол макүшита зиндааг Кёкүшюхо Т.Эрдэнэбаатар тэргүүлэн барилдахаар болсон байна. Тус зиндаанд Тамашохо Э.Энхманлай зүүн жигүүрийн хоёрт, Дэваноүми Т.Тэмүүлэн зүүн жигүүрийн зургаад, Ошома П.Дэлгэрбаяр зүүн жигүүрийн 12-т тус тус эрэмбэлэгдсэн байна. Мөн санданмэ зиндааны баруун жигүүрийг Ёошояма Б.Анхбаяр тэргүүлж барилдахаар болжээ.
