Улаанбаатар хот, 2025 оны 10 дугаар сарын 06 – Монголын Мянганы сорилтын сан нь Мянганы сорилтын II Компакт гэрээ буюу Усны Компактын хүрээнд улаанбаатарчуудын усны тогтвортой хэрэглээг урт хугацаанд хангах зорилготой Улаанбаатар хотын нийт ус хангамжийг нэмэгдүүлэх хөтөлбөрийг хэрэгжүүлж байгаа билээ. Уг хөтөлбөрийн үр өгөөж болон усны ухаалаг хэрэглээг олон нийт, залуучуудад түгээн таниулах зорилготой “Усан тойрог” гадна талбайн нээлттэй үзэсгэлэн-танин мэдэхүйн арга хэмжээг “Бидний ус - Бидний ирээдүй” уриан дор Улаанбаатар цэцэрлэгт хүрээлэн /Рио Парк/-д 10 дугаар сарын 4-10-ны өдрүүдэд зохион байгуулж байгаа юм.
“Усан тойрог” гадна талбайн нээлттэй үзэсгэлэн-танин мэдэхүйн арга хэмжээний үеэр Усны үнэ цэн, ухаалаг хэрэглээ, ус дахин ашиглалт, бохирдлыг бууруулах зэрэг устай холбоотой асуудлуудын талаар залуучууд, олон нийтэд мэдлэг мэдээллээ хуваалцахаас гадна Усны Компактын бүтээн байгуулалтууд, нэвтрүүлж буй шинэ дэвшилтэт технологи, инновацыг танилцуулна.
Арга хэмжээний хүрээнд долоо хоногийн турш усны салбарын байгууллагууд, Усны компактын оролцогч талуудын нээлттэй мэдээллийн өдөрлөг зохион байгуулах бөгөөд өнөөдөр буюу 10 дугаар сарын 6-ны өдөр Усны газрын дарга З.Батбаяр оюутнуудад “Хот, суурины ус хангамж, усны нөөцийн зохистой менежмент” сэдвээр лекц уншлаа. Усны газрын дарга З.Батбаяр “Усыг бид олон талаас нь харах ёстой. Усаа бид бүх талаар нь таньж мэдээд, бидний амьдралд ямар нөлөөтэй, Улаанбаатар хотын сайхан амьдрал усан дээр суурилж байдаг гэдгийг хүн бүр мэддэг байх ёстой. Өнөөдөр оюутнуудад ус, усны нөөц, саарал ус, түүнийг хэрхэн ашиглах боломж зэрэг олон сэдвээр мэдлэг, мэдээллээ хуваалцлаа. Халаалт, дулаан хангамжийн оюутнууд саарал ус, ус дахин ашиглах тухай сонирхож асууж байна. “Усан тойрог” үзэсгэлэн цагаа олсон, мэдлэг түгээсэн арга хэмжээ болж байна” гэв. Оюутнууд “Анх удаа гадаа, ийм сонирхолтой лекцэнд суугаад харах өнцөг маань өөрчлөгдөж байна. Усны талаар ийм өргөн мэдлэгтэй хүнээс лекц сонсоод, биширч байна. Ус хангамжийн инженерчлэл, усаа хайрлах, усны нөөцийн талаар, усыг яг одооноос л хайрлах ёстой гэдгийг үүгээр өнгөрч яваа хүн бүр анхаарч харж, үзэж, сонсоосой гэж хүсэж байна” гэж байв.
10 дугаар сарын 7-нд Монголын МСС-ийн Хаягдал ус дахин боловсруулах төслийн мэргэжилтэн, Монгол Улсын зөвлөх инженер Б.Батдэлгэр “Хаягдал ус ба ус дахин ашиглалт”, 8-нд УСУГ-ын Усны төв лабораторийн менежер Ц.Болормаа “Усны чанар, шинжилгээ, лаборатори”, 9-нд Монголын МСС-ийн Ус хангамжийн Баруун эх үүсвэрийг шинээр байгуулах төслийн захирал, Монгол Улсын зөвлөх инженер Б.Батсүх “Усны салбарын шинэ дэд бүтэц, техник, технологи”, 10-нд Монголын МСС-ийн Усны салбарын тогтвортой байдлыг хангах төслийн захирал Л.Өнөржаргал “Усны салбарын цахим дэвшил” сэдвээр лекц унших юм. Мөн энэ өдрүүдэд залууст зориулсан кино үдэш, яруу найргийн үдэш зэрэг олон сонирхолтой хөтөлбөрийг хүргэх юм.
