Гол мод – 2 дурсгалт газар нь Архангай аймгийн Өндөр-Улаан сумын төвөөс зүүн хойш 60 км зайд оршино. Уг газрыг нутгийнхан Балгасан тал хэмээн нэрлэдэг байна.
Булшнууд баруунаас зүүн тийш цуварсан байдалтай тавигдсан бөгөөд оршуулгын газар уртааш 2,2 км, өргөөш 1,3 км талбай эзэлнэ. Энд нийт 452 булшийг илрүүлж бүртгэсэн байна.
Гол мод – 2 дурсгалын 1-р булш нь эрт цагт тоногдож сүйтгэгдсэн байсан ч адууны тоног хэрэглэл, 10 гаруй сүйх тэрэгний үлдэгдэл, хаш эдлэл, чий будагтай сав суулга, хүрэл тогоо, гоёл чимэглэлийн зүйлс зэрэг сонирхолтой олдвор, эд өлгийн зүйлс илэрчээ.
Энэ булшнаас илэрсэн олдворууд дундаас амьтны дүрсийг товойлгон сийлбэрлэсэн хаш эдлэл, домгийн ганц эвэрт амьтдын дүрстэй эмээлийн хударга, хөмөлдрөгний алт, мөнгөн чимэгнүүд зэрэг нь судлаачид төдийгүй олон нийтийн анхаарлыг татдаг. Түүнээс гадна язгууртны булшны нэгэн дагуул булшнаас Ромын хийцийн хөх өнгийн шилэн аяга илэрсэн нь ховор үнэт олдвор юм.
