ОХУ-ын Гадаад хэргийн сайд С.Лавров Улаанбаатарт ганган хослолтой газардав. Стратегийн иж бүрэн түншлэлийн харилцаатай хойд хөршийн Гадаад хэргийн сайдын айлчлал Европт дайны гал ассан хүнд цаг үетэй давхацсан нь санамсаргүй хэрэг биш. ОХУ-аас Украинд хийж буй дайн дэлхий нийтийн анхаарлын төвд, бас хүчтэй эсэргүүцэл дунд өрнөж буй. Европ тив бараг бүхэлдээ, нэмээд дэлхийн бусад улс орнууд энэ дайнаас болоод ОХУ-д олон талын хориг тавьж эхэлсэн. Товчхондоо бол ОХУ олон улсын тавцанд ганцаардаж байгаа цаг үедээ Гадаад хэргийн сайдаа Монгол руу илгээсэн хэрэг.
Энэ бол өмнөх айлчлалуудаас тэс өөр нөхцөл юм. Ийм цаг үед Ерөнхий сайд Л.Оюун-Эрдэнэ дипломат уран нүүдэл хийснийг оросын хэвлэлүүд онцолж байна. Хоёр улсын хооронд төмөр замын шинэчлэл, уул уурхайн том төслүүд гээд гацаанаас гардаггүй олон асуудал бий. Эгийн гол дээр УЦС барих төсөлд Оросын тал байнга хориг саад болж ирсэн. Цахилгаан станцтай болчихвол Монгол Улс хойд хөршөөсөө царай алдахгүйгээр эрчим хүчний тусгаар тогтнолоо баталгаажуулах боломжтой. Тиймээс л энэ төсөл урагшилдаггүй, олон жил цаасан дээрх мөрөөдөл чигээрээ байсаар байгаа юм.
Хөрш орноосоо хань нөмөр хайж ирсэн С.Лавровыг Ерөнхий сайд Л.Оюун-Эрдэнэ хүлээж авч уулзсан. Гацаанд байгаа том төслүүдээ урагшлуулъя гэхэд С.Лавров толгой дохисон. Нэмээд Эгийн голын УЦС-ын төслийг урагшлуулъя хэмээн шулуухан хэлсэн. Энэ бол стратегийн иж бүрэн түншлэлтэй ОХУ-д Монголын талаас тавьж буй угтуулсан нөхцөл байв. Монголын шинэ үеийн улстөрчид хойд хөршдөө бөхөлзөхөө больж, эрх тэгш харилцааг эрхэмлэж байгааг барууны хэвлэлүүд ч онцолсон байна лээ. Олон улсын жишиг найрсаг хөршүүд нэг нэгийгээ хясан боох биш эрх тэгш харилцаж, хамтдаа хөгждөг. Л.Оюун-Эрдэнийн ОХУ-д тавьсан угтуулсан нөхцөл цаг үеэ ганган мэдэрсэн ухаалаг, бас зоримог нүүдэл байлаа.
