УИХ-ын нэр бүхий 22 гишүүн хүнсний хангамж, аюулгүй байдлыг хангах, ХАА-н үйлдвэрлэлийг дэмжих Түр хороо бйгуулах тогтоолын төсөл санаачилжээ. Ерөнхийлөгч У.Хүрэлсүх хүнсний аюулгүй байдалд онцголй анхаарал хандуулж, УИХ-ын тогтоолын төсөл батуулсан. Уг тогтоолыг амьдралд бодит ажил болгон амилуулахад Түр хороо гол анхаарлаа хандуулна гэж гишүүн Ж.Бат-Эрдэнэ хэлэв.
Манай улсын хүн амын хүнсний хэрэгцээг дотоодын үйлдвэрлэсэн мах, махан бүтээгдэхүүнээр 97, төмсөөр 100, гурилаар 98.3, хүнсний ногоогоор 60.7 хувийг хангаж байна. Үүнээс бусад хүнсний гол нэрийн бүтээгдэхүүнүүдийг гаднаас царайчилж авдаг гээд хэлчихэд буруудахгүй. Чанаргүй хүнс монгол хүний эрүүл мэндэд заналхийлэх болов.
Хүнсний аюулгүй байдал алдагдаж, хүнснээс хамаарсан өвчлөл, хүнсний хорлогод өртөгсдийн тоо нэмэгдсээр. Мэргэжлийн хяналтын ерөнхий газрын хяналтын итгэмжлэгдсэн лабораториудын нэгдсэн сүлжээний хэмжээгээр 2020 оны байдлаар хүнсний хими, нян судлал, хор судлал, ургамал хорио цээр, цацрагийн бохирдлын чиглэлээр 310.5 мянган үзүүлэлтээр шинжилгээ хийснээс 6.7 мянган сорьц Монгол Улсын стандартын шаардлага хангаагүй, бохирдлын түвшин 2.1 хувь байна гэж үзжээ.
Энэ тоон үзүүлэлт бол аймшиг. Дээрээс нь импортын хамаарал 42.1 хувь буюу хүнсний бие даасан байдал алдагдсан хэвээр байгаа юм. Тиймээс Ерөнхийлөгч У.Хүрэлсүхийн эхлүүлсэн Хүнсний хувьсгалыг УИХ, Түр хороо дэмжин ажиллахаар болжээ.
