Монголын зохиолчдын эвлэлийн ээлжит 17-р хурал өнөөдөр боллоо. Хуралд нийслэл Улаанбаатар хот болон 21 аймгийн зохиолчдын салбар зөвлөл, нэгдлийн төлөөлөл болсон 260 гаруй зохиолч оролцсон байна. Зохиолчид энэхүү ээлжит их хурлаараа МЗЭ-ийн Удирдах зөвлөл, Ажлын албаны өнгөрсөн дөрвөн жилийн ажлын тайлан илтгэл, МЗЭ-ийн Хяналтын зөвлөлийн тайлан зэргийг сонсжээ. Мөн бүтэц, зохион байгуулалтын асуудлаа хэлэлцсэн байна. МЗЭ-ийн Удирдах зөвлөл болон Яруу найраг, Үргэлжилсэн үг, Жүжиг, кино, Хүүхдийн зохиол, Хошин шог зохиол, Шүүмж судлалын Үндэсний төвүүдийн бүрэлдэхүүнийг Их хурлын төлөөлөгчдийн санал хураалтаар сонгожээ.
МЗЭ-ийн Удирдах зөвлөлийн даргад "Болор цом"-ын эзэн, яруу найрагч Б.Ичинхорлоо, "Болор цом"-ын эзэн, яруу найрагч Л.Хасар, утга зохиол судлаач, шүмжлэгч, доктор П.Батхуяг, зохиолч б.Сарантуяа нарын дөрвөн хүн нэрээ дэвшүүлэн өрсөлдсөнөөс яруу найрагч Б.Ичинхорлоо олонхийн санал авч Монголын зохиолчдын эвлэлийн Удирдах зөвлөлийн даргаар сонгогдсон байна. МЗЭ-ийн Удирдах зөвлөлд даргаас гадна Үндэсний долоон төвийн дарга нар багтдаг юм. Удирдах зөвлөл удахгүй хуралдаж Гүйцэтгэх захирлаа томилох ажээ.
