Монгол туургатан анх удаа цахимаар яруу найргийн наадам зохион байгууллаа. "Ярууслын чуулган"-д 440 гаруй бүтээл ирсэн гэхээр энэ удаагийн наадам хэр далайцтай болсныг илтгэх нэгэн баримт. "Channel11" телевиз, Монголын маркетинг, менежментийн хүрээлэн, www.shilen.mn сайтаас хэрэгжүүлсэн оюуны энэхүү төсөл өчигдөр шилдгүүдээ тодруулж, шагнал урамшууллаа гардуулав. Цар тахал дэгдэж хамаг бүхэн хаалттай, түгжээтэй энэ цаг үед оюун санаа, бүтээл туурвил сул зогсдоггүй гэдгийг энэ наадам харуулсан гэж хэлж болно. Ерөөс монгол туургатан цөм яруу найрагч ард түмэн юм гэх үг ч үнэний ортой мэт.
"Ярууслын чуулган" наадамд өөрийн бүтээлээр тэргүүн байр эзэлсэн Азийн шилдэг яруу найрагч, нэрт сэтгэгч, зохиолч Д.Урианхайг 30 сая төгрөгөөр, Дэд байрт шалгарсан МЗЭ-ийн шагналт яруу найрагч М.Амархүүг 15 сая, гутгаар байрт хүч түрэн орж ирсэн залуу яруу найрагч Г.Барсболдыг таван сая төгрөгөөр мялаажээ. Тусгай байр болон "Channel11" телевизийн захирлын нэрэмжит шагнал хүртсэн "Болор цом"-ын эзэн яруу найрагч Б.Баттулга, Д.Нацагдоржийн нэрэмжит шагналт яруу найрагч Т.Баянсан нар тус бүр гурван сая, бусад оролцогчдыг тус бүр нэг сая төгрөгөөр байлсан нь оюуны бүтээлийг үнэлэх цоо шинэ жишиг тогтоолоо.
Сүүлийн шатны шалгаруулалтыг Төрийн шагналт зураач С.Саранцацралт, гавьяат жүжигчин Г.Золбоот, гавьяат жүжигчин О.Бат-Өлзий тэргүүтэй есөн хараат бус хүн тунгаасан нь шүүлтийг шударга болголоо гэж оролцогчид дуу нэгтэй хэлж байсан юм. Ийнхүү хагас жилийн турш цахим орчинд үргэлжилж, яруу найрагчдын онгод цалгисан бүтээлүүдээр түмэн олны сонор, мэлмийг мялаан, оюуны цэнгэл эдлүүлсэн наадам өндөр босго тогтоон өндөрлөлөө.
