Улаанбаатар хотын хүн амыг ундны цэвэр болон ахуйн усаар хангаж, гарсан бохир усыг нь татан зайлуулах үүргийг Ус сувгийн удирдах газар хүлээн ажилладаг.
Нийслэлчүүдийг цэвэр усаар хангах зориулалттай шугам сүлжээг анх 1959 онд ашиглалтад оруулсан бөгөөд одоогийн байдлаар ус хангамж, ариутгах татуургын 856,5 км шугам сүлжээ бий болжээ. Жар гаруй жил болсон энэхүү шугам сүлжээ элэгдэлд орж, хуучирч муудсан учраас гэмтэл саатал ихээр гарч сэргээн засварлах шаардлагатай байгаа билээ.
Тэгвэл ногоон байгууламж сүйтгэн, газар сэндийчихгүйгээр шугам солих доторлох шинэ технологийг УСУГ нэвтрүүлээд чамгүй олон жилийн нүүр үзэж байна. Тодруулбал, хийсэн бүтээснээ сүйтгэхгүйгээр цэвэр усны шугам хоолойг засварлах европ технологийг нэвтрүүлсэн хэрэг.
УСУГ-ын удирдлагууд энэхүү технологийн талаар 2008 оноос эхлэн судалж, 2015 оны А/760 тоот захирамжийн дагуу 2015 оны аравдугаар сарын 29-ний өдөр Австри улсын RTI компани нь машин механизм, тоног төхөөрөмж, шугам доторлох багаж хэрэгсэл, материал зэргийг ханган нийлүүлэх гэрээнд гарын үсэг зурснаар энэхүү технологийг эх орондоо нутагшуулах боломж бүрдсэн юм.
Шугам хоолойг шуудуу ухалгүй доторлох шинэ технологийн “Close Fit” болон CIPP (Cured In Place Pipe) арга нь зам талбайг гэмтээж хөндөлгүй газар шорооны ажил хийлгэхгүйгээр шугаман дээрх 2 худгийн хооронд полиэтилин резинэн материалыг шугаман дотор сүвлэж доторлодог тул цаг хугацаа, хөрөнгө хэмнэдэг юм.
Улаанбаатар хотын хэмжээнд цэвэр усны 619 км шугам сүлжээ байдгаас:
- 310 км нь ган
- 18 км нь шилээр хүчитгэсэн хуванцар
- 251 км нь хуванцар
- 40 км нь ширмэн материалаар хийгдсэн байдаг.
Төслийн хугацаанд 30 километр шугам засварын ажил хийхээр төлөвлөсөн бөгөөд өнөөдрийн байдлаар 15 орчим км шугам сүлжээг сүвлэж доторлоод байна.
