Японы нийслэл Токио хотод мэргэжлийн сүмо бөхийн өчигдөрийн тэмцээнд маэгашира Тамаваши Б.Мөнх-Оргил озэки Митакүмиг ошидаши мэхээр ялж, дөрөв дэх даваагаа авлаа. Энэ нь түүний дараалсан 1426 дахь барилдаан байлаа.
Ингэснээр манай улсын бөх дараалсан барилдааны тоогоор Хавайн ардын Такамиямаг даван гарч, сүмогийн түүхэнд дөрөвт бичигдэх боллоо. Мөн энэ нь гадаад бөхчүүдийн хувьд тэргүүн амжилт болж байгаа юм.
Тамаваши барилдааны дараа “Түүнтэй барилдахдаа би урьд нь халз мөргөлдөлгүй зайлж, татаад байдаг байсан бол энэ удаад өөртөө итгэлтэй урагш дайрсан. Гадаадын анхны цолтой бөх Такамиямагийн рекордыг даван гарсандаа баяртай байна” гэжээ.
Тамаваши 2004 онд мэргэжлийн сүмод орсноос хойш 18 жилд нэг ч өдөр өнжөөгүй барилдаж байгаа. Өнөөдөр тэр ёкозүна Тэрүнофүжитэй барилдана.
