Австралиас Ж.Батзандан иржээ. Энэ тухайгаа өөрөө сүр бараатай зарлав. УИХ-ын гишүүн байхдаа АН-ыг бүлгийг 2 хувааж, эрх баригчдад урвасныхаа шагналд Австрали улсад Элчин сайдын зөвлөх хэмээх албан тушаал авч, амарч байгаад ирсэн. Дипломат албанд насаараа үнэнч зүтгэсэн олон хүн Ж.Батзанданг тооноор орж ирэхэд урам нь хугарсан. Дипломат алба Ж.Батзандан мэтийн урвагчдаар дүүрэхийг үзсэн дипломатчид урам хугарах байтугай л болно.
Иргэний хөдөлгөөний нам гэж төв талбай дээр торх нүдэж, Төрийн ордон руу чулуу шидэж асан энэ залуу Монголын улс төрд биеэ яаж үнэлж болохыг яруу тодоор харуулсан байдаг. Ц.Элбэгдоржийг Ерөнхийлөгчид 2 дахиа нэр дэвшихэд амаа олохгүй магтаж байсан баримт сонины шарласан хуудаснаа одоо ч дурайж буй. Төд удалгүй Ц.Элбэгдоржийгоо үзэхээ байж, Лу.Болдтой хавсран АН-ыг УИХ-д бүлэггүй болгож урвасан. Энэ урвалт зөвхөн АН-аас биш сонгогчдоосоо ч нүүр буруулсан жигшүүрт үйлдэл юм.
Амралтаа дуусгасан Ж.Батзандан Шинэ намаа хөсөр хаяад явсан. Одоо аль нам руу гэтэж байгаа бол. МАН, МАХН хоёр нэгдсэн, АН-д эргэж очих нүүргүй болсон тэрбээр ХҮН намд шургалахаар хар хор хутгаж яваа гэх үнэн худал нь мэдэгдэхгүй яриа гадуурж түгжээ. Аль ч намд орж, албан тушаалаар үзэл бодлоо худалдаж мэдэх учир түүнээс хүмүүс зайгаа бариастай. Эсвэл Жэнко Х.Баттулгатай хавсарч МАН-ыг татан буулгана гэх популизмаа үргэлжлүүлж мэдэх л юм. Эрх баригч МАН-д энэ бол толгойн өвчин.
Ямартай ч Ж.Батзандан гэдэг хүн Монголд ирсэн нь улс төрийн амьдралд сайн зүйл дагуулахгүй. Түүний улс төрийн богинохон зам мөрийг харахад урвалт, хуйвалдаан, албан тушаалын наймаа, дүр эсгэлтээр дүүрэн байдаг. Явсан газар бүртээ балагтай энэ эр С.Зоригийг хөнөөсөн хэрэг гэх мэт эмзэг сэдвээр цөөвөр чоно шиг хооллож ирсэн. Гэвч ямар ч асуудлын ард гарч байгаагүй. Түүнд хөгжлийн шинэ бодлого гэж юу байхав, ямар ч хамаагүй сэдвээр популизм хийж улс төрийн үхдэл болохоос аврагдах гэсэн өчүүхэн айдас л бий.
Б.ТҮВШИНТӨГС
