ОХУ-ын эрх баригчид Японы Ерөнхий сайд К.Фүмио, Гадаад хэргийн сайд Х.Ёшимаса, Батлан хамгаалахын сайд К.Нобуо зэрэг хэд хэдэн өндөр албан тушаалтан, бизнес эрхлэгчид, эрдэмтдийг нутаг дэвсгэртээ нэвтрэхийг хоригложээ. Энэ тухай ОХУ-ын Гадаад хэргийн яам цахим хуудсандаа мэдэгдсэн байна.
Энэхүү жагсаалтад Японы нийт 63 иргэн багтжээ. Оросын Гадаад хэргийн яамнаас гаргасан мэдэгдэлд"Кишида Фүмиогийн засаг захиргаа Оросын эсрэг урьд өмнө байгаагүй кампанит ажил явуулж, байж боломгүй үг хэллэг, түүний дотор гүтгэлэг, шууд заналхийллийг хүлээн зөвшөөрч байна" хэмээн дурдсан байна.
Япон улс өмнө нь Украины эргэн тойронд үүссэн нөхцөл байдлын улмаас Оросын эсрэг хэд хэдэн багц хориг арга хэмжээ авсан билээ.
